Torres Buchakas Patladeadas
de Hernán Rodríguez Fisse1
La boz del pilot del avión United me despertó i solo oyi esto: “ abasharemos en el aeroporto Dulles de la sivdad de Washington”. Miro la ora, mankan algunos puntikos para las mueve de la demanyana del dia onse de septembre 2001. Djunto a mi mujer i a muestras dos ijikas aviamos tomado el avión en Miami kon destino a Nueva York. Kualo akontezio? Vamos a un lugar i mos están enviando a otro? me dishe de mi para mí. Presto me alevanto i konfirmo lo ke oyi kon mis ijas. En eso viene una de las hosteses i le demando: “Deke el avión no se va al aeropuerto Kennedy, si no puede aterrizar en La Guardia, komo esta eskrito en el bilyeto? Me aresponde ke no tiene mas haber, ama komo no la desho kontinuar su kamino por el pasiyo, me avla en espanyol i dize ke al pilot lo sintió muy inyervozo, endemas ay kayadez total en toda la tripulasion.
Estavamos saliendo del avión en Washington para ir a tomar las validjas, kuando dan el orden de evakuar el aeroporto Dulles. Son las 9:37, en un restaurante vemos en la televisión lo ke esta akontesiendo: las Torres Buchukas de Nueva York fueron patladeadas por aviones United i American, los batimentos están en flama. Ainda nadie save porke akontesio. Unos avlan de una gerra, otros de un atentado teroristo.
Djuntos, toda la famiya, korrimos para apanyar un telefon publiko, kuando a la fin aferramos uno, no avia komunikasion. Le demandi el telefon móvil a una manseva koreana para avizar a mi ermano ke mora en Houston, Texas, ke estamos bivos i ke yame a Chile. No termini de avlar kuando un polis empesa a empusharmos a la kaleja. A pokos kilómetros del aeroporto otro avión de la kompanya American se estreya kontra el Pentagono. Es una estruision de mundo lo ke esta akontesiendo.
Solo kon lo ke tenemos enriva, sin validjas, un otobus mos yeva a un otel de la kadena Radisson. Yeno de djente, tomamos las ultimas siyas i echamos muestros kansados puerpos. Mos dan kafe kon biskuits i de pronto sentimos gritos de espanto de una mujer en el telefon, le dan la notisia ke un konosido se topava en el avión United ke ekplozo en Pennsylvania, a sien kilómetros de la sivdad de Pittsburgh. Solo vemos lágrimas i tristeza. Damos grasias al Dio ke se adjideo de mozotros i estamos bivos. La unika esplikasion es ke el volo de Miami a Nueva York yega kon poko kombustible i por esto el avion no fue tomado por los teroristos.
Kon mi mujer mos demandimos ke podiamos azer. Antes de salir de Santiago avia guadrado el numero de telefon de unos amigos ke moran en Washington para saludarlos. Despues de munchos intentos logre avlar kon Peter Rossi. Mos toma del otel a las sinko de la tadre, después de un largo torno, por modo ke las kalejas están kortadas por lo akontesido en el Pentagono. En kaza de Peter komemos un bokado sin ambre, mos da su kamareta de echar, el penserio en lo akontesido no mos desha dormir.
A la demanyana del dia 12 mos komunikamos kon el aeroporto i mos dizen ke todos los volos están sospendidos para entrar i salir de los Estados Unidos. La entrega de las validjas va a tadrar unos tres días, a lo manko. Mos fuimos a merkar ropa para trokar la ke teniamos enriva. Si el destino mos avia aretado en Washington era la oportunidad de konoser la sivdad. Kaminando por la plasa Raoul Wallenberg arivimos al United States Holocaust Memorial Museum, konsiderado uno de los mijores, después de Yad Vashem. A lo leshos vimos la Kaza Blanka, un kordon de siguridad de polisias de varios blokes tenia defendido de meter pie.
Al kuatren dia pudimos tomar las validjas. United Airlines mos ofresio de pagarmos bilyetos de tren a Nueva York, si ainda keriamos ir a una sivdad ke estava en avelut (dolio). Komo famiya akseptimos la oferta de la kompanyia. El viaje se lo aviamos aprometido kon mi mujer a las ijikas i estavan de akodro en visitar Nueva York, malgrado lo akontesido.
El otel se topava kaji al lado del batimento de las Nasiones Unidas. Kaminando por las kayes sentimos en el ayre una golor ke venia de la yamada zona zero; se me kedo en el garon i el meoyo, kreyo ke no se va a olvidar nunka. En todo modo de lugares publikos vimos fotos de los ke murieron en las Torres Buchukas, akompanyadas de kandelas ensendidas por la famiya i amigos. Otruna vez me viene un nudo en el garon. Los pokos neoyorkinos ke kaminavan por sus kalejas amostravan la grande dolor ke yevavan en sus almas. Tomimos el ferry para kruzar a Long Island i vimos de leshos el umo ke ainda salía de la tierra, komo los fornos krematorios durante el Olokosto.
Estava defendido de entrar al batimento del Empire State i a la Estatua de la Libertad no avia modo de arivar. Vijitimos el muzeo konosido komo Moma i kaminimos por el Central Park; no avia ganas de fazer una promenade en fayton, komo en una visita anterior a la sivdad. Kuando vino el dia de Rosh Ashana, la administradora del otel mos konsigio un permiso para entrar a una sinagoga del kartier. En eskapando el servisio pudimos echar lashon kon la djente ke vijitava siempre esta sinagoga. Oyimos lo ke les akontesio i komo bivieron kada uno de eyos la trajedia del dia 11 de septembre.
Los aeroportos se avrieron i los aviones empesaron a entrar i salir en forma normal. Las medidas de siguridad en La Guardia eran muy grandes i komprensibles. El volo en United para tornar a Chile lo izimos kon muncha mirikia i espanto. La trajedia akontesida la bivimos tan de serka ke mos marko muy fuerte a toda muestra famiya. Anke ya se pasaron un buen karar de anyos, ainda me parese ke solo fue ayer.
Notes
1. Hernan Rodríguez Fisse was born in Santiago de Chile in 1950, his father being born in Edirne and his mother in Istanbul. Both families descend from Jews exiled from Spain in 1492. They emigrated to Chile in 1949. He has a degree in Public Administration from Universidad de Chile and a graduate degree in Journalism from Catholic University. He is a Master of Arts in Political Science and a Doctor in International Relations. He teaches international business and business negotiation and conflict resolution at the Universidad de Chile, Universidad de Santiago, and Universidad Federico Santa Maria. He is Director and Editor of the Art, Science and Literature magazine Zejel and a permanent Collaborator of the magazines El Amaneser of Istanbul, Aki Yerushalayim of Israel, Foro of Mexico. He has been a leader of the Sephardic community of Santiago for the past thirty years and at present teaches ‘djudezmo’ to the members.