Lesyones Ke Devemos Aplikar En La Vida
De Haim Vitali Sadacca* z”l
No estes tanto siguro de ti i de tu rikeza,
No se save un dia komo puedra ser tu meza.
No mires a tener borraches por tu buena fama,
Un dia seras olvidado,ninguno te ama.***
Palmas i alavasyones enborrachan la persona
Tu korason no sientera mas las bozes ke sona.
No te deshes al koriente de un rio alokado,
Deves partajar tu amor, tu sensya i tu bokado.***
No te glorifikes kon tu pasajera ermosura,
Esta natura poseda una enorme mesura.
Un dia te revoltaras kontra todos los espejos
Te veras arugado, te toparas entre los vyejos.***
Mismo si kayo a tus kaveyos unas blankuras
I ke tu frente kon tu kara son yenas de rugas,
No te aravyes kon tu vida ni kon tu ventura,
Bive kon alegria es la ley de la natura.***
Mismo si pasates tu manseves kon vida dura
Olvida lo pasado,sonrizas seran tu kura.
Para estar feliz kon tu persona i famia
Deves ser optimista, mira a tu sol ke bria.***
Ve, ke tus keridos estan orozos kada dia,
Dales kerensya para verlos yenos de alegria.
Tu salud i un buen entorno ke seyan tu gozo,
Bive alegre en este mundo maraviyozo.
* Published in Ladinokomunita. Reproduced by permission of Rachel Amado Bortnick. This is one of the last poems written by this sensitive and wise poet, who left us for Ganeden only recently. May his memory be for a blessing.