MIS DOS PAPUS:
DOS SENYORES DJUDIOS-OTOMANOS EN EPOKA DE TRANSFORMASION
De
RACHEL AMADO BORTNICK*

Samuel Amado

Samuel Amado, 1915

Mis dos papus, aun ke tenian unos 20 anyos de diferensia en sus edades, kompartieron en vida una epoka enteresante, violenta i profundamente transformativa, ke vido la fin del Imperio Otomano i el nasimiento de la Republika Turka en 1923. Aki vos prezento sus retratos, amostrando la grande diferensia en la manera ke kada uno se vistia: el uno kon su djubbe larga i la fez en la kavesa, i el otro absolutamente al stilo evropeo, o "a la franka." Seguramente ke las vestimientas dan una idea de kual de eyos era mas aedado, ma estos dos sinyores, malgrado sus diferentes modos de vistirsen, eran tipikos ombres djudios-otomanos en la epoka ke kompartieron en sus vidas.

Samuel Amado, z"l , padre de mi papa Jozef Amado, z"l, kreyemos ke nasio aproksimadamente en 1855 i savemos ke murio en desembre de1923, sesh semanas despues de la deklarasion de la Republika Turka el 29 oktobre 1923. Mi papa i mama se kazaran muncho despues, en 1930, ansi ke yo no lo konosi, i lo ke se de su vida es lo poko ke me konto mi papa. (Siempre regreto ke no le demandi mas enformasiones de mi papa sovre su pasado.)

El solo imaje ke tenemos de mi papu Amado es el ke vesh aki, kon la sinyatura del dezinador del retrato: Samuel Telias, Smyrne/Izmir, 1915. Kontavan ke mi papu no se deshava fotografear porke tenia safek de violar el mandamiento (el segundo de los Diez Mandamientos) ke dize : " No agas a ti idolo, ni ninguna semejansa de lo ke ay en los sielos por arriva, ni de lo ke ay en la tierra por abasho ..."1 (No tengo sintido de otra persona, mezmo un haham, ke no se fotografie por razon de este mandamiento.) Dizian ke el Sinyor Telias, ke era vizino i amigo, izo este grande retrato (50 a 65 cm) en sekreto, i lo regalo a la famiya. Toda mi vida estava enkuadrado en la pared de muestra kaza en Izmir, i agora lo tengo yo en mi kaza en Dallas.

Samuel Amado era muy savido en la Ley,2 i tenia una yeshiva en Bunarbashi (Pınarbaşı), un kazal afuera de Izmir. No era rabino ma al pareser ensenyava a ijikos ayi.3 Ma su lavoro para ganar la vida era vender seguransa (sigorta) a los kazalinos turkos, viajando en araba kon kavayos de un kazal al otro una ves o dos al anyo. Su vistimienta era tipiko de ombres otomanos veneravles, sea porke era maestro, o por razon de su negosio kon kazalinos muslumanos.

A mi granpapa Salamon Algranti, padre de mi mama, lo konosi yo muy bien porke murio en 1954 a la edad de 79 anyos, kuando yo ya tenia 15 anyos. El era alto i muy grasiozo, i siempre estava vestido a la franka i elegante, komo en la foto aki, travada en 1927. De el tenemos munchas fotos, mezmo de los anyos 1911 i 1914 ande esta kon su famia, siempre vistido de la mizma manera. El era patron de butika ande vendia kazmires i empleyava shastres ke kuzian vestidos de ombres. El era enteramente un ombre urbano, tenia viajado a Italia, tenia mushteris (klientes) de alta klasa ke se vestian elegante komo el. Avlava muestro espanyol, ma savia avlar un poko de turko i grego tambien.

Los sigyentes evenimientos akontesieron en Turkia durante la vida de mis papus.

Evenimientos transformativos en Turkia en la epoka de mis papus:

Ke efeto tuvieron estos todos evenimientos alborotadores en la vida o los sentimientos de mis papus? Seria esto un sujeto para un livro, o dos, si saviamos mas de lo ke savemos. Mos podemos imajinar muncho, ma ay siertos kavzos ke podemos mensionar.

Todos los dos sinyores ya estavan kazados i kon kriaturas en las datas de ariva, i no fueron konskritos a la armada turka. Sus ijos i inyetos estuvieron soldados, ma el kavzo mas dramatiko i trajiko a mensinar es la de la desparision de Avram Amado en la Gerra Mundial I ke mensioni ariva.

La Desparision de Avram Amado

Avram era el ijo chiko de Samuel Amado i ermaniko de mi papa. En el 21 djunio 1915, a la edad de 18 anyos, el fue tomado de kaza por fuersa, arestado i konskrito a la armada aunke teniya nasionalidad franseza. (La famiya Amado eran venidos de Bayona en Fransia al presipyo del seklo 19.) Rifat Bali, el istodiador de los djudios de Turkia, investigo este kavzo (djuntos kon la de otros djudios de nasionalidad franseza ke tambien fueron arestados por refuzar de tomar la nasionalidad otomana) i en un artikolo en turko publiko las letras eskritas por los prizonyeros i sus famiyas.4 Entre eyas vemos una letra ke eskrivio Samuel Amado al konsulado Amerikano rogando su ayudo. Ma Avram nunka retorno, i no se supo ke akontesyo. Munchos anyos despues, un otro mansevo ke estava arestado kon en mizmo tiempo ke Avram, ma parvino de fuyirse de prezion, les disho a la famiya ke Avram se avia infermado i murio en el ospital militar. Ma no savemos si es verdad porke nunka uvo un raporto ofisial sovre su muerte.

En la Republika Turka

Samuel Amado vido la fin del sultanado otomano en 1922, i tambien la Republika deklarada kon su kapitala Ankara en Oktobre de 1923, ma murio poko depues, antes de ver los munchos reformas ke trusho Ataturk al pais. Ma Salamon Algranti bivyo mas de 30 anyos en la Republika, i komo todos los sivdadinos turkos, fue profundamente influensado por los trokamientos sosiales, politikos, i mas en esta epoka. Vale la pena akodrarmos de las prinsipalas reformas en la Republika Turka.

Copyright by Sephardic Horizons, all rights reserved. ISSN Number 2158-1800