Ke Bivas fina los Sien i Vente: Vidas Largas i kon Sentido
De Hernán Rodríguez Fisse^*

Los sefardíes semos afamados de bivir munchos anyos i kuando uno de mozotros eskapa de asoplar las kandelas del aniversario se le sueta ke biva munchos anyos. Tengo meldado ke el komer i bever sano se topa entre las prinsipales rasones para no deshar este mundo muy presto. Ay un refrán muy djusto amostrando lo ke estamos dando a entender: “kome el pan de ayer, la karne de oy i el vino de un anyo.”

El muy konosido mediko Maimonides rekomendava de bever supika de gayina para los ke sufrían de almorranas, abashadas o lepra. Fue tan afamada esta supa ke vino a ser konsiderada komo un mito universal de los judíos, sefardíes o ashkenazim. La unika preva sientifika de su poder kurativo es que las vapores de la supa sierven para deskonjestionar los bofes i las narizes.

El konsumir ajo se pensa ke ayuda a no kayer hazinos. En tyempos muy antikas se rekomendava su konsomasion komo repelente a las modreduras de las serpientes, para amahar la dolor de dientes, ansina komo un buen afrodiziako para los ke estavan sin ganas de azer el amor. Mas despues el sientifiko fransez Louis Pasteur deskuvrio ke el ajo puedia servir para matar las bakterias, kuando ainda no avia penisilina. Komiendo ajo se amengua el risko de aksidentes kardiovaskulares, porke el puerpo va a tener menos trigliseridos en el kolesterol. Ay kienes no kreyen nada de esto i dizen ke el ajo es solo para estar kon mal guezmo.

Los gregos, romanos i ejipsianos, rekomendavan meterse a la dusha kon agua yelada en kada dia. Dizian ke mijora la sirkulasion de la sangre, apreta el kuero i no solo sierve para despertar en la demanyana. Los japoneses meten el puerpo en kaidas de agua i profitan de meditar, una praktika konosida komo misogi. En el banyo turko, el hamam, kale mojarse en primero kon el agua kayente i mas despues deve estar yelada. Los chinos son grandes konsumadores de yervas medisinales, por egsemplo, el ginseng; para el ke se echa en la kama i no durme es rekomendable bever sedron, el inyervozo ke tome poleo. Komer esparragos alimpia los rinyones, porke es un diuretiko, lo mismo akontese kon la kanela.

El eskritor arjentino Ernesto Sábato, ke desho este mundo en 2011, mankandole pokos mezes para kumplir los sien anyos, dezia ke la vida es kompartir kon los otros, tener AMISTADES. Rekomendava oyir a los amigos, amostrar interes en lo ke eyos azen i dizen, dar ayuda kuando tienen menester, sentir sus problemas komo propios i endemas akseptarlos komo son i no komo mos plazeria ke fueran.

A las palavras de Sábato adjustaria ke kultivar la amistad es komo el kazalino kultivando lo ke asembro, una forma de tener salud en el alma, tanto o más importante ke la salud del puerpo. Kiero proposar ke al avrir el komputador en kada demanyana eskrivan emails, a lo manko a dos personas, ande amostren ke las keren i tienen interes en lo ke akontese kon eyas; esto es bueno para los otros i para mosotros, porke al akodrarmos despues es komo bivirlo otruna vez i esto mos aze estar kontentes.

A la forma ke mos alimentamos i al kultivo de la amistad podemos adjustar el tener rasones para bivir, un buto por alkanzar, una idea para konkretar. El sentido de la vida troka de ombres i mujeres de un día para otro, lo importante es el sinyifikado ke le da kada uno. Dinguno puede dizirle a otro en ke konsiste la rason para bivir, kada uno debe toparla por sí mismo.

En los tiempos aktuales mos enkontramos kon personas ke solo keren azer lo ke otros azen i ansina estamos frente al konformismo. Son munchos los ke saven lo ke no keren azer, pokos los ke tienen haber de kualo azer kon sus vidas i ven, por egzemplo, en el konsumismo, merkar i merkar, una via de eskape o alivio.

La mankura de inisiativa en las personas o el degano es lo ke “aze a la umanidad baskular eternamente entre dos ekstremos: la tensión i el fastidio” (Shopenhauer).

Ama ay kasos totalmente a la kontra de lo ke dizia el filozofo. Tuvimos la grande oportunidad de eskrivir un livro kon la biografia de un ombre fuera de serie, Elie Alevy. La marca de Auschwitz (2018), ke se invento i reinvento sienes de veses, kuando en el kampo de konsentrasion logro perder el miedo a morir. La voluntad por darse rasones para bivir se le enfinko de tal manera ke nada ni nadie lo pudo detener en lo ke kizo azer despues de la Shoá. Su ultimo proyekto de vida, a los 92 anyos, fue kontar todo lo ke le akontezio desde ke vino a este mundo. Nasio el 15 de mayo de 1926 en Salonika i el 12 de noviembre de 2019 mos desho para siempre, un anyo despues ke publikamos su livro en Santiago de Chile.

^* Hernán Rodríguez Fisse was born in Santiago de Chile in 1950, his father being born in Edirne and his mother in Istanbul. Both families descend from Jews exiled from Spain in 1492. They emigrated to Chile in 1949. He has a degree in Public Administration from Universidad de Chile and a graduate degree in Journalism from Catholic University. He is a Master of Arts in Political Science and a Doctor in International Relations. He teaches international business and business negotiation and conflict resolution at the Universidad de Chile, Universidad de Santiago, and Universidad Federico Santa Maria. He is director and editor of the Art, Science and Literature magazine Zejel and a permanent collaborator of the magazines El Amaneser of Istanbul, Aki Yerushalayim of Israel, Foro of Mexico. He has been a leader of the Sephardic community of Santiago for the past thirty years and at present teaches ‘djudezmo’ to the members.