Konferensya en Londra sovre el Avenir Dijital del Ladino
De Carlos Yebra López^*

De la syedra a la derecha, Alejandro, Yvette, Eliezer i Carlos.

Me agradaria partajar kon vozotr@s el reporte de la konferensya ke fiestimos la semana pasada en la Kaza del Senado de Londra, intitolada ‘Saved by the Digital: Ladino Communities of the 21st Century’. Vino muncha djente, mizmo algunos ke mos meldan i mos eskriven en LK, komo muestro karo Michael Alpert :)

El evenimiento prinsipio kon los komentos de Julian Weiss (profesor de estudios espanyoles en King’s College London) i Ladino 21, en dando la bienvenida a tod@s.

Despues amostrimos tres projektos mezo los kualos podemos empleyar lo dijital para salvar el ladino. Renata Brandao echo lashon kon mozotr@s sovre el internet i las teknolojias dijitalas, Naomi Wells avlo del galut dijital i Alejandro i yo avlimos de Ladino 21.

Sinko puntos despues tuvimos la prezentasyon prinsipala, de Eliezer Papo, ken darso sovre un alay de sujetos sefardies komo Aki Yerushalayim, komo se yama muestra lingua, kualo afita kon la Real Akademia del Ladino, i ansi i ansi.

Kuando eskapo esta prezentasyon, tuvimos el atelye de la kompania britanika uTalk en prezentando el kurso de Ladino ke apunto kitaron. Podesh echar un ojo a la publisita en el sitio de uTalk: https://utalk.com/en/store/ladino (A los Izmirlis va agradar la foto ke metieron!). Muncho mos englenimos en djugando al kurso, ansi ke a algunas demandas sovre la kultura sefaradi kon la aplikasyon Kahoot.

Imajen seleksionada para reprezentar el kurso de Ladino de uTalk

Al kavo del kavo muestra kara Yvette Burki avlo del ladino del punto de vista de la linguistika kritika i eskapimos el evenimiento kon unos minutikos de demandas i repuestas.

Muncho mos ambezimos tod@s traverso esta konversasyon entre el ladino i la teknolojia kon el buto de prezervar el Ladino!

^* Carlos Yebra López is associated with the Department of Spanish and Portuguese Languages and Literature, Graduate School of Arts and Science, New York University. For an interview, see https://www.polyglotassociation.org/carlos-yebra-lopez