Kaminos de Sefarad: Red de Djuderias de Espanya
De Liliana Benveniste
*
Embashadora de la Red de Djuderías de España
La Red de Djuderias de Espanya –Kaminos de Sefarad- es una asosiasion formada por sivdades i puevlos ke kontan kon un patrimonio istóriko, artistiko i kultural, erensya de las komunidades djudias ke moraron en estos lugares.
Las sivdades miembros de la Red lavoran de modo aunado para el kudiado del patrimonio istoriko i de la erensya djudia kreando prodjektos kulturales, turistikos i akademikos, i kumpliendo kon una politika de trokamiento de eksperiensias nasionalas i internasionalas ke ayuden al konosimiento i respekto entre puevlos, kulturas i tradisiones.
Ávila, Barcelona, Béjar, Cáceres, Calahorra, Córdoba, Estella-Lizarra, Hervás, Jaén, León, Lorca, Lucena, Monforte de Lemos, Oviedo, Plasencia, Ribadavia, Sagunto, Segovia, Tarazona, Toledo, Tudela y Tui vienen rekuperando desde aze más de 20 anyos sus djuderías, metiendo tino, tiempo i rekorsos en la rekuperasion de kazas, kayes, palasios i todo modo de edifisios ke se puedan salvar del ulvido i reskatar el konosimiento de las vidas de familias djudías de todo manadero i kondisión. Istoria okultada, agora rekuperada i amostrada dospues de mas de kinientos anyos.
Marka de la Red en las kayes de las djuderias.
La Red de Djuderias en kada una i una de sus sivdades, lavora grandemente en poner en valor sus patrimonio material i no material, enfortesiendo su konservasion, markado i rekuperasion. En las kayes, kazas, palasios i murayas de las djuderias se izieron una grande cantidad de pujamientos para dar a konoser i aserkar esta información a sus propios sivdadinos i a los vijitantes.
Tambien se bushkan, rekuperan i kuentan istorias de las vidas de las famiyas djudias ke un dia moraron en Espanya a traverso de los tayeres i festivales ke se azen en torno a la kultura i la tradision sefaradí.
Marta Push (Madrid), Djerenta de la Red de Djuderias de Espanya y Liliana Benveniste en el Akto de nombramiento en la Embashada de Espanya en Buenos Aires, Ardjentina.
De mezmo, i sigiendo los butos de su kriasion, la Red lavora fuerte en relasion kon otros paizes, en espesial para difuzar el patrimonio sefaradí komo una koza ke mos auna i ke esta viva entre Espanya i el mundo, ansi tambien tiene el buto de kriar a traverso de la kultura i de la istoria una eksperiensia turistika unika, viva i interesante para todo modo de puvliko. La partesipasion de la Red de Djuderias en ferias i djornadas de turismo importantes, la organizasion de eksposisiones i enkontros, los akordos kon otras institusiones kulturalas dientro i afuera de Espanya, son la fin de estos esforzos.
La Red pusha para azer un lavoro muy fuerte en difuzar una grande parte de la istoria de Espanya ke es menester gradrar viva, i tambien difuzar la edukasion en las valores de la toleransia i konvivensia de todo modo de grupos asigun sus kreensias i penserios, una koza ke es grande menester en este tiempo.
En este esforzo para kumplir kon sus objektivos de modo internasional, kon los paizes en los ke egzisten grandes komunidades sefaradíes oy i ke estan interesados en el legado djudio ke ay en las sivdades espanyolas, la Red partesipa en reuniones fuera de Espanya.
A traverso de la Plataforma Erensya, reuniones ke organiza el Sentro Sefarad-Israel de Madrid en distintos lugares adientro i afuera de Espanya desde 2011 i kada dos anyos, la Red partesipa de estos enkontros de reprezentantes de komunidades sefaradíes de todo el mundo kon reprezentantes propios, otoridades de sivdades de la Red i de institusiones importantes de Espanya.
Yo fui konvidada a estos enkontros desde el sigundo, en 2013, i ansina se estrecharon las relasiones entre la muestra Plataforma eSefarad.com de Ardjentina kon el Sentro Sefarad-Israel, La Red de Djuderias de Espanya, komunidades i otras personas i institusiones ke lavoran por la kultura sefaradí en distinto paizes.
En 2018 la Red krio un programa de Embashadores de la Red de Djuderías de Espanya para dar una boz direkta i de konfiansa, en los paizes ke konsideró ke azian un grande lavoro por la istoria i la kultura de los djudios sefaradíes, para ke estas personas sean las ke den i aresivan la informasion de sus paizes.
A la proksima edición vos vo a kontunear eskrivir en kurto sovre kada una de las sivdades ke forman parte de la Red de Djuderias de Espanya, sus patrimonio i sus haberes.
* Liliana Tchukran de Benveniste Editora www.eSefarad.com, esefarad@esefarad.com. Vicepresidente: Centro Cultural Sefarad, info@ccsefarad.com. Embashadora: Red de Juderías de España, embajadorarg@redjuderias.org, www.lilianabenveniste.com.ar.