La Komunidad Sefaradia de Izmir, Entonses i Agora
De
RACHEL AMADO BORTNICK*
La komunidad djudia de Izmir fue la tresera mas grande en el Imperio Ottomano despues de Salonika i Istanbul, ma se formo mas de 100 anyos mas tadre de los otros sentros djudios otomanos. En 1492, kuando los djudios fueron expulsados de Espanya, Izmir dainda era muy chiko lugar kon poka povlasion. Kuando empeso a ganar importansia komo puerto maritimo, a mediados del siekolo 16, las autoridades otomanas trusheron djudíos aki de otras provinsias del Imperio para povlar la sivdad. Mas tadre yegaron mas sefaradis de otras sivdades i munchos konversos portugezes. Ansi ke la majoridad ya eran djudíos otomanos akulturados, i ya tenian la lingua komun de djudeoespanyol, lo ke les ayudo a formar una komunidad bien organizada en kurto tiempo. En los kavos anyos del siekolo 17, Izmir ya tenía mueve sinagogas. Kon tiempo a esta komunidad ladino-avlante se integraron djudios romaniotes ke avlavan grego, djudíos ke avlavan arabe, i mezmo ashkenazim ke avlavan yiddish. De esta manera se desvelopo la rika kultura sefaradí Izmirli ke kontinua a egzistir oy en dia.
La primera rejion de arresentamiento de judíos en Izmir era en el sentro de la sivdad, i se konosio komo “La Djudria” (Judería en espanyol) en el ladino Izmirli. Las sinagogas mas antiguas, la kaza de Sabetay Sevi, ansi ke restos de algunos kurtijos ande bivian munchas famiyas djudias proves, se topan aki dainda oy en dia.
Verso la fin del siekolo 19, djudios empesaron a pasarsen a Karatash, la rejion mueva konstruida al bodre de la mar. Kon tiempo esta rejion se incho asta las montanyas, siempre abitada en mayoriya por djudios. La elegante sinagoga Bet Israel se avrio aki en 1907 i en kurto tiempo se izo el sentro nukleo de la komunidad entera. En el mismo anyo el riko komersiante Nesim Levi finansyo la konstruksion de la bien konosida torre de la Asansör para fasilitar la suvida a la montanya de la kaye prinsipal paralel a la mar. La kalejika ke va a la Asansor fue nombrada Dario Moreno en 1992, en onor del djudio Izmirli ke moro en una kaza aki, i despues se izo un kantador i aktor muy famozo en Paris.
En 1913 Nesim Levi dono su grande kaza en Karatash para un muevo ospital djudio. Este se engrandesio kon tiempo i se modernizo, inkluyo el azilo de viejos i la mikve de la komunidad. El edifisio del ospital se vendio a un enterprizo privado en 2013, i aunke no es mas djudio, fonksiona dainda komo el ospital de Karatash.
El viejo semeteryo de Bahri Baba fue establesido en el siekolo 17 serka de Karatash, ma en 1926 se destruyo a kavza de la renovasion munisipala. La komunidad transfero algunas tombas viejas al mas muevo semeterio en Gürçeşme. El semeterio de oy en Altındağ se avrio en 1930.
En los anyos de 1950 los djudios de Karatash empesaron a pasar a la mas mueva rejion de Alsancak, rekonstruida despues del grande fuego (insendio) de septembre 1922, kon apartamentos modernos, bulevardes, i el grande Park de Kultura (Kültürpark.) Aki se fraguo la mueva sinagoga Shaar Ashamayim, la kuala fue re-konstruida i engrandesida en 2019, i kontiene tambien el sentro komunal djudio.
Las ermozas kazas de Karatash fueron kaje todas destruidas para fraguar ayi apartamentos altos, i ande un tiempo avia las eskalikas enriva de la mar de las kazas privadas, agora ay una ancha karretera .
En Izmir se nota munchos avansamientos sosiales. La primera imprimeria se establesio ayi en 1657, i el primer periodiko en ladino en el Imperio otomano (yamado La Puerta del Oriente) se publiko aki en 1846. La eskola de la Aliansa (Alliance Israelite) avrio sus puertas aki en 1873, i trusho edukasion evropea i la franseza a kriaturas djudias.
Djudios Izmirlis desveloparon sus variedad de lingua i folklor djudeoespanyol. Tienen sus proprios intonasion i pronunsasion, kon leksiko del portugez i las munchas lenguas ke sintian en sus entorno, en esta sivdad multietnika i multilingual. El folklor sefaradi Izmirli tambien reflekta este entorno, i tambien sus raises espanyolas.
La Diminusion de la komunidad
En 1910 en Izmir avia serka 30, 000 djudios (21,102 otomanos i 8,000 de soditansia ajena) lo ke azia el 13% de la povlasion jeneral. Oy en dia ay 1,000 djudios en una sivda de mas de 4 milyones de abitantes Esta reduksion dramatika fue a kavza de emigrasion en tres periodos prinsipales: la primera, de 1908 a1924, vido la despartision de mansevos ke no kerian servir en la armada otomana en tiempo de gerras. Lo mas de eyos se fueron a las Amerikas i a Cuba, i despues de arresentarsen izieron trayer a sus famiyas. La segunda ola de emigrasion fue la aliyah masiva al estado de Israel, de 1948 a 1954. La tresera empeso en los 1960s i kontinua dainda en un tempo gradual i dirijida a munchos paizes inkluyendo Israel, U.S.A, Canada, Australia, i varios paizes en Evropa. Ultimamente, munchos Izmirlis djudios resivieron la soditansia espanyola o portugeza, achakes de las leyes resientes de estos paizes ke dieron la posibiltad a personas de erensia sefaradi, ma muy pokos pasaron a bivir en estos paizes.
La komunidad Izmirliya de oy: adientro i afuera de Izmir
La chika komunidad ke kedo en Izmir oy trata de mantener una vida djudia vibrante, i tambien de prezervar la erensia fizika i kultural del pasado. Kuaje todos biven en Alsancak, kon el sentro de la sinagoga de Shaar Ashamayim, i raramente utilizando la sinagoga Bet Israel de Karatash. Sinko de las viejas sinagogas se estan restorando adientro del eskopo del “Projekto Izmir” de la komunidad en kolaborasion de la munisipalidad i de la fondasion Kiryati (https://www.aejm.org/members/the-izmir-project/).
Es klaro ke munchos mas djudios Izmirlis biven afuera de Izmir, i afuera de Turkia, ke los pokos ke biven en esta sivdad oy. Estos Izmirlis no solo ke mantienen el atajido emosional a la sivdad de sus raises, ma munchos pasan este sentimiento a sus ijos i inyetos. Las mas impresionantes komunidades Izmirlias de la diaspora son las mas viejas: las de Argentina, Uruguay, i Brazil, ande mizmo los bizinyetos de los imigrantes gizan las komidas, kantan las kantikas, i guadran las tradisiones relijiozas i otros kostumbres de sus antepasados imigrantes de Izmir. Ultimamente programes via Zoom de Cidicsef (Centro de Investigacion y Difusion de la Cultura Sefaradi) en Buenos Aires inkluyeron el tema de kostumbres sefaradis ke eran egzaktamente los de Izmir. Rosa Ventura, profesora en la Universidad de Tucuman, Argentina, publiko sus memorias de su nona Izmirlia, Rosa Noé, kon los refranes, las dichas, i las kantikas ke se ambezo de eya.1
Ay tambien desendientes de Izmirlis ke mostraron sus atajido a la sivdad de sus orijines kon los livros ke publikaron. Entre estos estan Haim Nahum de Paris (Juifs de Smyrne XIXe - XXe Siècle, Aubier, 1997),2 i Dina Danon (The Jews of Ottoman Izmir, Stanford University Press, 2020). Tambien Rahel Saba Wolfe, ija de Izmirlis en Israel, kompleto su teza sovre la prensa djudia en Izmir, i esta preparando el livro para publikasion.3
Ansi es ke la kultura sefaradi de Izmir bive oy no solo en esta ermoza sivdad de Turkia en el bodre del mar Egeo, sino ke tambien en todas las partes del mundo ande djudios Izmirlis se arresentaron durante los ultimos sien anyos.
* Rachel Amado Bortnick, born and raised in Izmir, Turkey, is a retired ESL teacher living in Dallas, Texas, who has been active in the promotion of Judeo-Spanish language and culture for many decades. She is featured in the 1988 documentary film, Trees Cry for Rain: a Sephardic Journey and, in 1999, founded Ladinokomunita, the Ladino correspondence group on the Internet, which now has over 1600 members from 40 countries.
1 Silberman de Cywiner, Maria Esther, i Rosa Ventura de Bialek. El patrimonio cultural sefardí: identidad y memoria. UNT, Argentina, 2012.
2 El livro de Nahum fue traduzido al turko por una Izmirlia, Estreya Seval Vali. Izmir Yahudileri, 19-20ci yüzyil. Iletisim, 2000.
3 La madre de Rahel, Sara Algranate-Shahar, kontribuo kantes de Izmir a la koleksion de la muzikologa Israeli Susana Weich-Shahak para su proksimo CD.