Dina Danon
THE JEWS OF OTTOMAN IZMIR: A MODERN HISTORY

(Los Judios de Izmir Otomano: Una Istoria Moderna)
Palo Alto, Stanford University Press, 2020  ISBN‎: 150-361-091-8
Revisado de
Rachel Amado Bortnick¹

En el Imperio Otomano, Izmir (Esmirna) tenia la tresera mas grande komunidad djudia despues de Salonik i Istanbul, ma investigasiones akademikas konsantradas en la istoria de esta komunidad fueron pokas. El livro en inglez The Jews of Ottoman Izmir: a Modern History es un paso grande para remediar esta mankura. El lvro analiza la vida de djudios en Izmir en las dekadas finales del sieklo 19 i prinsipios del sieklo 20, i en partikular, los esfuersos echos para rezolver los problemes sosiales i ekonomikos de la komundidad, en paralel a la modernizasion jeneral en el Imperio Otmano en jeneral i en Izmir en partikolar.

La autora, Dina Danon, de famiya Izmirli, es profesora de estudios djudaikos en la universidad de Binghamton, New York. En este estudyo eya mos traye munchas informasiones muevas tomadas de jurnales i boletinos kontemporaneos de Izmir, lo mas en ladino eskrito en letras rashis, i mos propoza ke esta istoria poka konosida es un modelo para analizar el proseso de modernizasion en otras sivdades sefaradis i djudias.

La tabela del kontenido del livro, aki kon mi traduksion de los titolos, amostran el orden tematiko de los sujetos diskutidos, i la grande kantidad de notas i la rika bibliografia. Vash a remarkar tambien, ke aunke el livro es en inglez, algunos titolos kontienen biervos o frazas en ladino.

KONTENIDO

• Introduksion
• Kapitolos:

1. The Djuderia and Public Space (La Juderia i el Espasio Publiko)
2. Kualo es la Vera Karidad? What is True Charity?
3. Make a Monsieur out of him (Azelo un monsieur)
4. Sustaining the Kehila:Taxing el puevlo (Sostener la kehila, i taksar el puevlo)
5. Authority and Leadership: Representing el puevlo (Autoridad i dirijentes: Reprezentar el puevlo)

• Notas al teksto; Bibliografia (kon lista de archivos, periodikos, i livros )
• Indeks

El tema sentral del livro esta sinyalado en las primeras frazas de la Introduksion. Despues de la muerte del Hahambashi (Gran Rabino) Avraham Palachi en enero de 1899 la komunidad se avia divizado en dos kampos, uno konservativo ke keria mantener el sistem viejo, i otro de los “kolelistas”, ke kerian konstituir un konsilyo elejido para la administrasion de la komunidad. Por ilustrasion la autora mos da aki parte de un largo dialogo fiktivo, publikado en el jurnal La Buena Esperansa de Izmir, entre dos personajes, “Simon” (el tradisional) i “Ruben” (el reformisto) ke diskuten sus puntos de vista. Esto sinyala tambien a los munchos manaderos archivales, i sovre todo los jurnales i periodikos, ke la Dra. Danon konsulto para kontarmos esta istoria enteresante i poko konosida. La Introduksion mos da tambien un kurto resumen de la istoria presedente a esta epoka: el establesimiento i desvelopamiento de la komunidad djudia de Izmir. La sivdad era chika i insinyifikante asta ke empeso a ganar importansia komo porto de komerso en los medianos del siglo 16, i entonses las otoridades Otomanas transferaron aki djudios romaniotes de varias sivdades serkanas, ansi ke sefaradim de Salonik i otras sivdades, A estos se adjuntaron eks-konversos venidos de Portugal, i mas otros venidos de varios lugares , asta ke se formo la komunidad djudia en los primeros anyos del siglo 17.² Los djudios se aprovecharon de la aktividad komersiala del porto para eksportasion de produktos agrikulturales de Anatolia i de komerso kon Evropa. Ma la situasion ekonomika I kulturala de los djudios Izmirlis deskayo despues del alboroto del falso mashiah Sabetay Sevi en los 1660s, i de kuando el komerso paso en mano de kristianos. En la epoka de modernizasion en el sieklo 19 siertos djudios pudieron aprovechansen del desvelopamiento de la sivdad, I de la edukasion franseza ke avia yegado kon las eskolas de l’Aliansa (Alliance Israelite Universelle – AIU.)

Los kapitolos ke sigyen mos dan los detalyos de akontesimientos i desvelopamientos en la mueva epoka. La Juderia (konosida komo “la djudriya” entre los djudios Izmirlis) es la rejion del primer aresentamiento i ande dainda moravan la majorida de los dudios de Izmir.³ La provedad ke avia aki i su demonstrasion en las kayes, la mala o muy limitada edukasion para las kriaturas, i mas, son las kestiones deskutidas aki. El segundo mos konta de las varias asosiasiones de karidad ke se fondaron para evitar la kojeta⁴ (begging) de los proves en las kalejas. La edukasion de las kriaturas i las eskolas de la Aliansa azen parte de la seksion sovre la emportansia de azer monsieurs a los ijikos, ke es evropealizarlos!

Aki mensionare una koza personala: la foto en la pajina 106 del livro, metida para amostrar una famiya evropeada o moderna, es de mi propria famiya: mi granpapa Salamon Algranti⁵ i mi granmama Joya kon sus primeros kuatro kriaturas, ( la ijika chika enpies es mi mama, Sara.) La autora la tomo en Bet Atfutsot de Israel, ma yo tengo la orijinala en mi kaza. El anyo es 1914, no 1905 asegun esta en el livro.

Los trokamientos en la administrasion de la komunidad i la “politizasion” de la gabela, la taksa ke se kovrava en la vendidad de karne kasher, es el sujeto del kuatren kapitolo. La gabela era un sujeto emportante porke traiya la gran parte del revenido finansial a la komunidad. Asta los medianos del seklo 19 su presio, determinado por el gran rabino, no se kontestava. Ma en esta epoka el puevlo empeso a kesharse mezo boletines, foyetones i jurnales. Aki en pajina 143, ay una foto enteresante de un reklam en La Buena Esperansa del negosio de Bayrakli ande se mensiona las diviziones en la komunita : los Kolelistas – los ke apoyavan el Kolel, konsilyo de miembros elejidos – , i los Palachistas ke preferavan dar el poder de desizion al Hahambashi Salamon Palachi, ijo del difundo Avraham Palachi.

Mos akodraremos aki ke el magazen Bayrakli apartenia al filantropo Nesim Levi Bayrakli ke, entre otros, finanso la fragua de la bien konosida Asansor en el kartier de Karatash en Izmir, ande su nombre esta gravado ensima de la entrada.

Aki una chika kritika: esta foto del reklam de Bayrakli es el solo kavzo ande el livro mos amostra el imajen de un dokumento orijinal. Todos los otros dokumentos estan transmetidos solo en traduksiones al inglez. En este uniko ke tenemos topi un yerro en la traduksion.⁶ Este yerro no troka nada de emportansia para el livro, ma ver unos kuantos mas dokumentos orijinales mos podia asegurar ke las traduksiones eran korektas, i tener tekstos en rashi o soletreo podia adjustar a todo lo enteresante en el livro.

Los detalyos de la formasion del Kolel i sus aktividades, i el rolo del Hahambashi komo intemediario entre la komunidad i el governo Otomano son deskutidos en el sinken kapitolo del livro. Es de notar ke en Izmir, a la kontra de en otras sivdades sefaradis, el Hahambashi Avraham Palachi apoyo i enkorajo la edukasion en las eskolas de la AIU. Tambien, los jurnales de Izmir tuvieron un grande rolo en dar boz a los sentimientos del puevlo, en diseminar informasiones menesterozas para partisipar en las desiziones komunitarias.

Por konkluir, el livro The Jews of Ottoman Izmir: a Modern History, mos prezenta la istoria de la komunidad de Izmir en la epoka de modernizasion. La provedad, ke en el pasado era konsiderada komo una kondision normal, mas no era mas akseptavle. Reformar i modernizar la edukasion de las kriaturas ayudo a ke puedan ganar sus vida en lavoro. Tambien el puevlo kijo tener parte en las desiziones komunalas, i ekspreso su opinion en reuniones, deskorsos, boletinos, artikolos en jurnales, ets. (Estos se topan dainda en los archivos en Izmir, i en Israel, lo ke fue un riko manadero de informasion para la autora.) Aun ke uvo tensiones i kontraversias, i a vezes pletos entre las diferentes klasas sosioekonomikas, lideres djudios Izmirlis perkuraron de amijorear la vida de sus korelijionaryos en toda manera a sus despozision.

El livro tambien amostra ke este analisis es un prosseso diferente del ke fue empleado para las komunidades djudias de paizes evropeos. La epoka yamada Haskala (“Jewish Enlightenment”) en Evropa trato de trokar las tradisiones djudias para konformarlas kon la vida moderna, i asimilar a los djudios a sus ambiente non-djudio. La istorya de los djudios de Izmir amostra ke ayi, komo en las komunidades djudias del Imperio Otomano, el djudaismo no era dingun problem; a la kontra, era el vehikulo de la komunidad para topar solusiones a sus problemes sosiales, i progresar en un ambiente moderno.

---

1 Rachel Amado Bortnick, born and raised in Izmir, Turkey, is a retired ESL teacher living in Dallas, Texas, who has been active in the promotion of Judeo-Spanish language and culture for many decades. She is featured in the 1988 documentary film, Trees Cry for Rain: a Sephardic Journey and, in 1999, founded Ladinokomunita, the Ladino correspondence group on the Internet, which now has over 1600 members from 40 countries.

2 Asegun el livro en turko de Siren Bora “Birinci Juderia” (Istanbul:2021) sovre la Primera Juderia de Izmir, el mas viejo rejistro Otomano ke egziste de Judios ke devian pagar dasyo de djizye (taksa a los non-muslumanos) es datado de 1641.

3 Aki moraron djudios asta la aliya masiva al estado de Israel en los 1950s. La famoza kaleja de las sinagogas, Havra Sokağı, es situada aki. El projekto de Erensia Judia de Izmir esta restorando las sinagogas .

4 Este biervo esta eskrito kojita en ellivro, ma kreygo ke es un yerro. Mozotros dizimos kojeta.

5 El es el uno de mis dos papus sovre los kualos eskrivi en Sephardic Horizons el anyo pasado.

6 Ay un yerro en la traduksion de este anunso en el livro: “de lunes en ocho” no es “Monday at eight”; es “a week from Monday.”