Varsovia Destino Krusial

By HERNÁN RODRÍGUEZ FISSE¹

Este es el título de mi muevo livro publikado en Santiago de Chile por Ediciones ZÉJEL 2022, eskrito en espanyol moderno. Para los ke les plaze meldar para kumplir dos butos, ambezarsen i englenearsen, vos akonsejo no deshar de tener esta novela en vuestras bibliotekas.

La istoria ampesa kuando Arthur Kowalski, el protagonisto, empyegado del Servisio Diplomatiko de los Estados Unidos, se kaza kon una mujer de famiya sefaradi, Elisa Toledoth, i se van en 1943 a lavorar en la ambasada norteamerikana en Asunción, la kapital del Paraguay. Komo el marido se da a entender en lingua ingleza, Elisa le da un ayudo kon las otoridades militares del governo en avlandoles en djudeo-espanyol. En este payis forman buenas amistades, ama después de tres anyos, deven viajar a otro destino diplomatiko.

La Segunda Gerra Mundial se eskapa i los Kowalski arivan a Varsovia. La kapitala polaka es una sivdad en sinizas, ande no kedo piedra enriva de piedra; los nazistos la destruyeron entera. Ama, se está empesando la Gerra Yelada entre los Estados Unidos i la Unión Soviétika. Los dos payizes tienen espiones, los rusos profitan de unas ermozas mansevikas polakas para meterlas a la kama kon los diplomatikos norteamerikanos i ansina travarles los sekretos, kontra sekso.

Lo ke vos esto kontando akontesio de vedra i las datas para eskrivir la novela fueron tomadas de informes sekretos de la Central de Inteligencia Americana (CIA), artikolos de los jurnales, djuntamientos de politikos en el Kongreso Amerikano, livros de memorias de ambasadores en Polonya, investigasiones akademikas i muncho más.

Djunto a lo ke se pasa kon los espiones, la novela mos amostra akontesimientos de grande importansia mundial, komo la muerte de Julio i Ethel Rosenberg en la siya elektrika en los Estados Unidos, akuzados de ser traidores; lo akontesido en la Cuba del diktador Fulgencio Batista, la boda de la artista Grace Kelly kon el prens Rainier III de Monako, la entrada de los tankes sovietikos en Budapest, la perrika Laika embiada al espasio por los rusos, la afamada gizandera de komida franseza, Julia Child, el Papa Pío XII i su kolaborasion kon los nazistos, John Kennedy i el arrivo de un katoliko komo Prezidente de los Estados Unidos, Nikita Khruschev i el Muro de Berlín fraguado para divizar a la Almanya en dos, entre otras munchas kozas ke se pasaron en el mundo entre 1945 i 1965.

A los ke keren resivir el livro, les demando de eskrivir al korreo zejelchile@gmail.com I por la posta se va al adreso ke vos plazga.

¹ Hernán Rodríguez Fisse was born in Santiago de Chile in 1950, his father being born in Edirne and his mother in Istanbul. Both families descend from Jews exiled from Spain in 1492. They emigrated to Chile in 1949. He has a degree in Public Administration from Universidad de Chile and a graduate degree in Journalism from Catholic University. He is a Master of Arts in Political Science and a Doctor in International Relations. He teaches international business and business negotiation and conflict resolution at the Universidad de Chile, Universidad de Santiago, and Universidad Federico Santa Maria. He is director and editor of the Art, Science and Literature magazine Zéjel and a permanent collaborator of the magazines El Amaneser of Istanbul, Aki Yerushalayim of Israel, Foro of Mexico. He has been a leader of the Sephardic community of Santiago for the past thirty years and at present teaches ‘djudezmo’ to the members.