Primer Golpe de la Aliya
De Niso Guvenis1
Era un dia de Viernes...
Los dias de Viernes eran dia de muzika en el Ulpan. Vinia un mansevo kon su gitara i mos ambezava kantikas popularas de muestro muevo pais.
Profiti de akel dia para kompletar las formalidades de “Reshayon” (permiso para konduizir; Ing.= Driving License, Tr.= Ehliyet) israeliano. Era defendido de konduizir mas de 3 mezes kon Reshayon otro ke el israeliano.
El buro del Ministeryo de Transporto estava yeno de djente. Kuando vino mi torno, me prezenti a la ofisyala responsavle, una mujer de apenas 30 anyos, i le remeti mi reshayon turko, rogandole, kon palavras respektuozas ke me ambezi resientemente en ebreo en el Ulpan, ke me lo troke por un Reshayon Israeliano. La ofisyala tomo mi reshayon turko i se fue a su meza. Despues de azer lo menesterozo en varios rejistros, kon grande seryozedad, torno i me dyo un papel en dizyendo ke fin dos semanas el Reshayon Israeliano me arrivera por posta.
Le rogi entonses de darme atras el reshayon turko porke ainda lo nesesitava siendo ke me iva akoruto a Turkia para kompletar mis echos i tenia menester de konduizir en akel pais.
“Emposivle!” me respondio la ofisyala de un tono no muy agradavle.
Le demandi deke a los Amerikanos i a los Evropeos les esta retornando sus reshayon orijinal i a los Turkanos no!
Esta vez, kon una boz alta, me responde ke “esto no me enteresa a mi” i mete fin a la diskusyon gritando :
“Adoni! (Sinyor) Esto es la ley! Si no te plazyo, torna a Turkia!”
Kualo?!!! No me kreyi a lo ke sinti.
Esta ultima fraza me entro komo un kuchiyo en el meoyo. No saviya kualo dizir. Kontinuar a diskutir, gritar, chaftear sovre la meza no era mi karakter.
Kayado kayado, sali del buro i tomi el kamino del Ulpan todo en pensando a lo ke paso.
No era posivle! Este modo me ivan a resivir en mi muevo país?
Puede ser ke todo lo ke mos konto el reprezentante de la Sohnut ke vino a Estambol para konvensermos, era falso? No es ke en Israel todos estávan prontos a resivirmos kon brasos aviertos i ayudarmos?
No sea ke ize yerro en desidando de azer Aliya?
“Si no te plazyo, torna a Turkia!”
“Si no te plazyo, torna a Turkia!”
Estas palavras no me estavan salyendo de mi kavesa. Kamino entero estuve pensando en estas ideas pretas. Ayegi enfin a Bet Brodetsky en Ramat-Aviv onde se topava el Ulpan.
Suvyendo las eskaleras avagar avagar verso mi klasa, triste i la kavesa yena de penseryos negativos, chaftearon a mis oyidos las bozes kakofonikas de mis amigos ke se estavan ambezando una kantika mueva:
Od tire, od tire
Kama tov yihiye
Bashana bashana ha-baa….”
Vas a ver, vas a ver
Ke bueno va ser
Al anyo, al anyo el vinien…
1 Nasido en Estanbol en 1931, Niso (Nesim) Guvenis estudyo en la eskola franseza St. Benoit. Kazado kon Leyla Madjar. Izo aliya en 1981. Tiene una ija i un ijo ke biven en USA. Aktualmente es pensionario en Ramat Hasharon, Israel.