Siri, dezime una koza…

Maor Malul¹

Dispues de aparejar su chanta i meter el komputer adientro, Avner s'akodro ke ulvido furchearse los dientes. Kuando yego ala kamareta de banyo, topo la puerta serrada.

“Un punto, baba!”, grito Rahel desde adientro

“Kualo azes en este banyo?”, demando

“Shh, no grites, ija!”, sushureyo Suzan. “ya eskapamos, Avneriko”

Ayde! Esto presado, oy apresento el prodjekto ke desvelopamos kon la Belediye!”, disho Avner mientres ke tomava la chanta ala espalda.

Rahel i Suzan salieron pishin de la kamareta de banyo. Avner entro; mientres ke furcheava sus dientes, aprovecho de pishar; no keria kedar kon ganas en el trafik de la sivdad. Ensupito, una koza blanka i roz en el chop atiro sus ojos; dechidio kavakar el chop.

Un test de prenyadez!

Avner no keria pensar. Rahel era de 13 anyos i no tenia enamorado. Suzan? No, ama ...los meses d'alkavo aboltava tadre del buro, adjuntada kon Orhan, el muevo muhendis kon ojos vedres del kualo no eskapava de avlar i kon el kualo afilu djugava al tenis kada Shabat. Abolto al lavamanos a lavarse la boka; se miro al espejo: kada dia las entradas de sus kaveyos grizos eran mas profundas; ya no eran entradas ama pistas de ayroporto.

Salio de la kamareta de banyo i salio pishin de la kaza; mientres muchiguava el prestor del Tesla en el otoyol, demando kon boz temblorosa:

“Siri, dezime una koza..”

“Deke tenes menester, Avner?”, arespondio una boz elektronika de mujer

“Kual es la shans ke tiene una mujer de kedar prenyada si el espozo tiene echa vazektomiya?”

“Depende, kuando era echa?”
“Unos 10 anyos”

“Muy poka, una shans de 0.08%”

Avner kedo en shok. Keria yorar. Keria arrondjarse kon la araba desde el ponte.

“Ayde Avneriko, kale pensar esto kon el meoyo yelado”, disho kon boz baja

En yegando al buro, echo la chanta al fotolyo.

“Bre, kualo afito? Tenes kara de Tisha b'Av”, demando Yako mientres ke s'alevantava.

“Nada, el trafik era una kagada”

Yako miro su ora. “Ama yegates pishin”

“Pishin? Komo saves?”

“Tali me disho ke yego kuando salites del parking de kaza komo una raketa”

“Tali? Ke aze la tu mujer en mi kaza tan demanyana?”
“No se, kozas de mujeres!”, disho Yako suviendo los ombros. “Suzan le disho ke keria avlar kon eya una koza”
El sonete del telefon interrompio la kayadez del buro.

“Avner, Yako, yegaron los de la Belediye”, disho Aline desde el otro lado del telefon.

Durante la reunion, Avner kedo kon el meoyo komido por sus pensamientos. Deke Suzan keria avlar kon Tali ensupito? Kedaria prenyada? Bueno, ke otra koza azia ese test de prenyadez en el banyo?

Mientres ke pensava, una direktora de la Belediye le izo una demanda.

“Vozos kreyen ke puedemos azer una versiyon del prodjekto desvelopada para telefon i tablet?”

Avner se kedo mirando la mano de la mujer; eya tenia un aniyo de espozamiento igual al ke el i Suzan tenian.

“Avner?”, demando Yako.

Avner, anke fisikamente se topava en el buro, tenia el meoyo metido en detalyos de su vida kon Suzan: el lise, enveranos en la ada, su espozamiento, la kaza ke merkaron, viajes en famiya a Marmaris, Ostria, Israel, Tailandia, Rahelika…ama el imej del test de prenyadez kedava afiksado en su meoyo.

Avner!” grito Yako. “Te kedates durmido kon los ojos avyertos?”

Ensupito, Avner abolto ala realidad. “Pardon,” aklarando el garon, “tengo muncho dolor del meoyo, kale ke troke las pindolas de la tension” disho ala direktora de la Belediye. “Si puede ser, me eskrive las demandas por e-posta?”

“Esta bueno, sinyor Benaroya. Saludozo ke este”

En abashando por el asansor, tomo el telefon

“Siri, dezime una koza..”
“Deke tenes menester, Avner?”
“Saves ke es la gueb preta?”

Sintio dos bips; no tenia sinyal en el telefon. Dechidio asperar a estar en la araba.

Avner yego en kaza dispues de las 11. Penso ke Suzan i Rahel ya durmian, ama su mujer ainda estaba desperta en la kamareta.

“Dia lungo, Avneriko?”, disho Suzan mientres ke trokava el kanal en la televizion. En el frijider te guadri pizza del pranso. Metela al forno 5 puntos.

“Bueno. Mersi”, kontesto Avner sin mirarla, mientres ke se asentava a kitarse las kunduryas

“Ke tenes en ese sako?”, demando Suzan mirando ke era una papelera sin desen.

“Bavajadas ke mos trusheron los de la Belediye”

En aboltando de la kuzina, Avner se kito la kamiza i el pantalon, se metio ala kama i kedo mirando el chati. Kreyia ke el korason se iva a salir del pecho.

“Avneriko … tengo menester de kontarte una koza”, disho Suzan kon la boz temblante

“Dezime, kualo afito?”, kontesto Avner mientres ke estirava el brazo siedro, verso el adientro del sako.

“Rahelika se kedo prenyada del treinador de tenis”

Avner se kedo mudo.

“Avner? Me sentites?”

“Si, si… bueno, kreyes ke seyan buchukes?”, disho Avner, aboltando la pistola al sako.

---

1 Maor Malul nasio en Venezuela, i vive en Yerushalayim desde 2013. Eskrivio su primer kuento (en Kastilyano) kuando ambezava en la eskola, enspirado por la poeziya ke eskrivia su tio Rafael I los kuentos ke le merkava su nona. Esta eskriviendo un roman parsionalmente en djidio enspirado en la Salonik de fin de las 1920.