El Kolej Meksiko
De Cairo C. Robles1
La eskola ande estudyi el primero anyo de la eskola primaria se yamava Kolej Meksiko, era un kolej de relijiozas katolikas i yo iva en la tadre, de la una a sesh, esto por el lavoro de mis djenitores, ansina ke en invierno kuando avoltava a la kaza ya era de noche. Ma era divertido por mor ke un chiko otobus pasava en midi por las kriaturas i despues mos deshava en muestras kazas al eskapar el diya eskolar. El kolej, despues de la puerta prinsipala, tenia un kortijo al sentro rodeado de salones de klasas i un portiko ande los elevos djugavamos, en este lugar tambien se azian las fiestas ofisialas komo el diya de la Independensia, ma también seremonias relijiosas komo la Semanada Santa i Pascua. Detras al fondo del kortijo, en pasando una puerta de fierro, avia una ermoza guerta de abondantes flores de todas maneras, frutales, vedruras i yervas de olor, tambien una iglesia i la kaza ande moravan las relijiozas. No era permetido de entrar ayí, pero los chikos lo aziamos a las eskondidas porke avia kaminikos i arvoles grandes; endemas, los mansevikos de la eskola sekundaria kontavan istorias i advertian ke si te atrivias a entrar a la guerta, aparesian los espiritus de las mondjas defunktas o podias ser tomado por “los de abasho.” Ma la kuriosidad de un chiko es grande i despues de entrar kalmos, kayados, ma si un chiko dava chiyo de spanto en la eskuridad de la guerta, todos korriamos a la puerta de fierro!!!
Me akodro del diya de la primera klasa de mi vida, yo teinia sinko anyos solamente, i yego a la klasa la profesora, una mondja muy serioza grande i morena, vistida toda de blanko de los piezes a la kavesa, kon un chapeyo kon alas, i un karton a la mano kon una letra “A” eskrita i a lado la imajen de un Avion ke mos amostrava, ansi kada diya los chikos mos ambezavamos una letra, una palavra i despues sus conbinasiones. Al terminar kada klasa, la profesora enkolgava en la pared el karton kon la letra del diya, adjuntandolos uno al otro asta krear ansi en suksesion un mural. Muncho kijiera saver o akodrar komo era el nombre de esta mujer porke eya me ensenyo a meldar i eskrivir el kasteyano, ma tengo una vaga idea de ke su nombre era Rosa. Una mujer ke teinia un karakter muy duro, nunka la vide sonriyirse, ma de muncha edukasion i intelijensia.
Sala de klazas, Kolegio Mexico
En sigundo anyo de la eskola primaria, una tadre de oktobre al salir de la eskola, avia en los kuluares un rumor ke una fabrika muy grande de Matel, ande azian kuklas, se estava kemando i esta industria estava solamente a unos 100 metros de mi kaza, la djente en el kolej dizian ke avia empiegados feridos i moridos, indemas desde leshos, desde el kolej, víamos la kolumna de umo i lumbre, las kriaturas ke moravamos serka de la fabrika estavamos muy espantadas, sin saver de lo grave ke era!!! El shofer de la eskola, akompanyado de una mondja, pudo irse asta el parke del kuartier ande stava mi kaza, asta adonde la polisiya le permetio, i de ayí fuimos peligrozamente kaminando akompaniados de un polis a la kaza de kada kriatura. Al entrar a la keye ande kresi, vide a los ombres, mis vizinos i a mi padre abatidos enriva de los tejados mojando apresurados las kazas, mientres ke las sinyoras en medio de la kaye avlavan espantadas i fumavan sigaros kon ansias de pedrer kaza, otras rogando al Dio ke se apiade i mos guadrara del fuego. Tambien se oia el bruido de los koches de ambulansia i bomberos. Dinguno de mozos vizinos hue a echarse a dormir akeya noche, la djente kedo esperando ahuera de las kazas kon los parientes, el bagaje enchido de ropas, perros i gatikos a los koches esperando avizo de salir, ma la djente refuzava de irse i deshar sus kazas, kozas i animales.
Teatro, Kolegio Mexico
Al diya sigiente a la manyana, la grande fabrika era solo un monton de fierros pretos i torsidos i en la sivdad, en el chiko otobus i en el kolej, todos avlavan de la kemasion de Matel, i por mi kaza el vento kaente aynda golia de umos, tristezas i yoros, i ansi turo varios diyas. Mi madre dizia ke muestros vizinos nunka fueron tan unidos komo akeya noche, ke la kalamidad une a las personas, o mijor dicho: el miedo no anda en azno, todos partajavan kumidas, agua, pan, dulses, kafe, milizinas de kaza, buenos dezeos i afalagos. Despues todo fue igual i kada kual a lo suyo, a su famiya i a lavorar para ganar la vida. De akeyos diyas pokas akodransas me kedan, ma del enviejisido Kolej Meksiko, de sus salones, kortijo, guerto asolombrado, del kurso de primero kon la profesora “Rosa” i de la noche del fuego daynda oy estan muy klaras i en mi memorya .
1 Cairo C. Robles: Arkitekto i profesor de Teoria y Disenyo de la Arkitektura por ventisyete anyos en la UABC, Autonomous University of Baja California. Orijinario de El Centro, Kalifornia, en los Estados Unidos. Agora interesado en estudiar y eskrivir en la lingua ladina istorias familiares, de la gente i de lugares ke reflektan la vida de los Sefaradies en la costa oeste de la Amerika. Kon munchas grasyas a Rachel Amado Bortnick.