El prezente de Izakito

De Maor Malul¹

Selma keria yegar presto a su kaza; era Tu b’Av, el diya en el kalendario ebreo del amor. Lo mas negro del kavzo era ke eya ainda no tenia merkado dingun prezente. Ama, kualo azer? Eya tenia munchas kozas ke azer en el buro, ademas kalia azer las validjas para vijitar a sus djenitores en Estambol. Una koza era vedrad: Izakito no espertava en eya el mismo ardor ke antes unos kuantos mezes.

— Le tengo merkado munchas kozas: chikolata, livros, kamizas i perfumos ke nunka kulanea. Atyo, kualo puedo merkarle?— disho de eya para eya mientres ke aprontava la chanta kon el komputer para salir del buro. El otobus de la kompaniya asperava en la kaleja.

Unos puntos dispues, el otobus arrivo a la gara de trenos, i dechidio suvir al sentro de butikas kon el buto de mirar un prezente para Izak. Ensupito, topo una butika ofisiala de DC comics ke estaya inchida de kozas de Batman: kamizas, kupas, chapeyos de beisbol, chinis de komputer, validjas troli, kuviertas para el telefon, oras, afilu antojos i un mabul de komiks. Perfekto!

Dispues de merkar el prezente para Izakito i asperando ke le plaziera el svetshirt preto kon el sinyo del muevo filmo de Batman i una kupa para bever kave, abasho a la gara de trenos. Ainda tenia tiempo para arivar en kaza, meterse al banyo i estar pronta para kuando yegara Izak, komo siempre kon el mizmo buketo de las mizmas flores de varias kolores.

Una koza afitava en la estasion. Miro al ekran i no topava dinguna informasion.

— Guay, deke estan tan yenas las plataformas? —le demando a uno de los ofisyeres de la kompanyia de trenos ke dezian kualo era el destino de los trenos ke estavan para venir kon boz alta.

— El sistem de kontrolo de los trenos no fonksiona —arespondio el ofisyer mientres aserkava la oreja a su radio de aldikera.

— Kualo?

— Dizen ke un haker tomo kontrolo del sistem i esta demandando munchas paras. Komo ainda no tenemos kontrolo elektroniko, los trenos estan viajando kon instruksiones ke mandamos por radio.

— Merde! Por esto la gara esta tan yena komo dia de Noel en Amerika!

— Los trenos estan arivando al menos 15 puntos tadre, madmuasel.

— Uff …bueno, mersi muncho.

Selma tomo el telefon i mando un mesaje de boz a Izak:
Izakito, pardon ke vo arivar tadre ama el sistem de los trenos esta kayido.

Un mesaj de teksto aparesio en el ekran de su telefon. Izak sintio en los haberes de radio sovre el problem kon los trenos, tambien le afito a el kon el tramvay.

Selma meldava el mesaj de Izak mientres ke kaminava verso la makina de bokales de sumo i kola. Ensupito, chafteyo kon un benadam i su telefon kayo. Kuando abolto para tomarlo, el ombre lo tenia en la mano i lo pozava en la de eya.

— Pardon, mi chanta es muy grande i no vidi ke te topavas serka. Kreygo ke vo abasharla mientres yega mi treno —disho el askier.

— Esta bueno, la gara esta komo tenikyel de sardelas, no keda espasio para moverse- arespondio Selma, mirando la uniforma suzia del askier.

— Estas aboltando de la rezerva?

— Si, so komandante de unitad —dize el askier — mes i medio en servis.

— Guay, deke treinates tanto tiempo?

— No treinava; somos Duvdevanim.

— Ah, una operasion kontra terroristos? —demando Selma kon kuriozitad.

— Si. Kuando no esto en el moshav kudiando los almendreros, so un vishnero —dize el askier, tresladando el nombre de su unitad kon una sonriza ke amostrava dientes perfektos.

— Ke orgolyo, huersas de elitas!

— Ansina dize la djente —dize el askier, abashando los ojos

— Ke afito? Dishi algo negro?

— No, no. Es ke …pedrimos dos kompanyeros

— Guay, ke mal! Sus almas ke repozen en Ganeden —disho Selma mientres ke mirava los kaveyos enrulados de Lior i la barva ke no konosia arapadora desde mez i medio atras.

— Amen. Me yamo Lior. I tu?

— Selma. Un plazer —disho eya, estirando la mano verso Lior

— Un plazer —disho Lior, alkansando la mano de Selma.

Selma sintio el kontraste entre sus manos chikas i las muy muncho rugozas de Lior, mas grandes ke las de eya; a la kontra de las manos delikadas de Izak; bueno, es ke Izak era pianisto, enjenier de komputasion i djugava satranch; emposivle ke tuviera manos de ombre del kampo.

No reushitaron suvir al treno; la gara tenia muncha djente. Dechidieron tomar el viniente i no azer el viaje debutados. En suviendo, Lior le demanda:

— Keres asentarte en el vagon d’alkavo? Siempre esta yeno de relijiozos, pero komo todos se suvieron en el primer treno, puedemos avlar kon repozo.

— Bueno, vamos —disho Selma, sin deshar de mirar las pestanyas lungas y enruladas de Lior i sus ojos pretos.

Avlaron de munchas kozas: muzika, komida, viajes … una koza yevo a la otra. El rankontro fue kurto, ama intenso. La primera en salir de la kamareta de banyo fue Selma, la kuala echo ojos para verifikar ke dinguno iva ver a Lior salir unos puntos dispues ke eya. Selma tomo las eskaleras i se asento en la parte de ariva. La mujer asentada enfrente de eya no deshava de mirar a Selma. Deke la mirava ansina? Puede ser ke tenia el guezmo de Lior en su piskuezo?

Komo el tramvay ainda no fonksionava, dechidio de andar pishin verso su apartamento, pensando i kuanto tiempo tenia sin azer los echos buenos de esa manera. En arrivando, tomo un banyo i metio el vistido a la kolada mientres ke se banyava. Kuando kedo pronta, eskrivio un mesaj para Izak.

Sintio la soneria; era Izak. En avriendo la puerta, le da las flores i una eskularicha.

— Ande topates mi eskularicha? —disho Selma, surprizada — No meti tino ke la pedri!

— Me topi kon un amigo del lise en la kaleja ke la arekojio, kreygo ke en el treno.

— Kualo? No vidi dinguno de tus amigos en el treno.

— No kreygo ke t’avli de el, no bive aki. Se yama Lior.

---

1 Maor Malul nasio en Venezuela, i vive en Yerushalayim desde 2013. Eskrivio su primer kuento (en Kastilyano) kuando ambezava en la eskola, enspirado por la poeziya ke eskrivia su tio Rafael I los kuentos ke le merkava su nona. Esta eskriviendo un roman parsionalmente en djidio enspirado en la Salonik de fin de las 1920.