Un Tresoro de los Djidyos: Los Pirké Avot
De Santos (Shem Tov) Mayo1
Es savido ke el Pirké Avot, la saviduría de muestros padres, mos ambeza munchos usos i echos de la vida de el djidyó. Pirké vyene de la palabra pérek, ke kere dizir kapítolo. Al empesijo de Pérek IV Mishná 1, meldamos los dichos de Rabbi Shimon ben Zomá ke fue un Tannaita del sekolo sigundo.
- Ken es savio? Ken se ambeza de todos.
- Ken es fuerte? Ken komanda sus pasiones.
- Ken es riko? Ken se alegra kon su parte.
- Ken es onorado? Ken dá onor a otros.
Don Isaac Abravanel mos ambeza en sus derashot ke estas kuatro kualidades son las más bushkadas por toda buena hevrá. Esta saviduría no es solo de Shimon ben Zomá. Vyene de los tyenpos de el Profeta Irmiyahu (9:22) i mos amostra ke el djidyó de syempre tuvo grande apresio por la virtud. El benadam ke bive kon estas virtudes se torna él mismo savio, fuerte, riko i onorado, ke es lo ke todos perkuran de ser.
Ben Zomá mos ambeza ke la saviduría no vyene sola. Kale ke uno bushke la vedrad i perkure enteder kualo es bueno i kualo no. Kale ke se ambeze kualo es el yetzer hará, ke moz yeva a ovrar para el mal, i kualo es el yetzer hatov ke todos tenemos syempre adyentro de mozotros mismos. La fortaleza es domeñar muestras propias pasiones i ovrar bien para mozotros mismos i para la hevrá.
Kale tambyén ke el riko i el prove entyendan ke no ay seguridad. Unos suven i otros abashan en la eskalera de la vida. El savio bushka de guadrar para la vejez i el loko gasta lo ke no tyene en su mansevéz. Afilu la su salud.
Kale ser umilde i akodrarse lo ke dize el refran: “ken dá kavod toma kavod”. Esto vale kon la mujer, los ijos i el haver. Estas son las reglas de el bien azer i de el bien bivir. Para amejorar a el mundo (Tikkun Olam) kale azer syempre el Bien.
Notes:
1. Born in Buenos Aires, Argentina, in 1928. His parents were from Manisa, Turkey, arriving in Argentina in 1923, they joined the Sephardic Turkish Community in Buenos Aires. His first languages were Ladino, Spanish and Hebrew. He achieved a High School Diploma in Chemistry and later a Doctorate in Physics from La Plata National University, followed by two-year post-doctoral studies in USA at Brookhaven National Laboratory and University of Pittsburgh. After 15 years with the Argentine Atomic Energy Commission, he immigrated to the Washington DC area in 1973. He is married to Elena Aizenberg and has three children and six grandchildren (B.H). This article has been lightly edited by Ralph Tarica.