Chile, Jeografia Atavanada
De Hernán Rodríguez Fisse1
El tio Jacques Rodríguez, ermano de mi padre, fue el primer emigrante de muestra famiya ke se vino de la Turkia a Chile en 1931. Le plazia eskrivir i kada nada mandava letras a Estambol, ande kontava lo ke azia en el payis i adjuntava fotos. Mi padre tomo kon si más de kuarenta de esas fotos kuando también emigro a Chile en 1949. Las tengo guadradas komo fidel testimonio istoriko de muestra famiya.
Estava eskapando el anyo 1939 kuando en una de las letras ke eskrivio mi tio dizia ansina: “Esto muy en kudiado lo ke esta akontesiendo en Evropa. No esto deshando de meldar lo ke mos estan informando los jurnales de la gerra. La Turkia se topa en un lugar muy estratejiko, para los vapores ke pasan de la mar Preta al Mediterraneo, i se la van a kerer apanyar. Me kontastes ermano ke te yamaron otruna vez para el askerlik i te mandaron a la frontiera kon la Rusia. Ten kudio kon el frio, beve raki i metete kalzas de lana…
En otra letra konta esto: “Aze unos mezes ke lavoro komo empleyado en un grande magazen de Osorno. Es una sivdad ke esta a novesientos kilómetros al sud de Santiago. En “La Femme Chic”, komo se yama, vendo mas muncho kostumes de mujer. El patron es un sefaradí, muy agradable i de kaveyos kolorados, ke se vino de Monastir. Es de alkunya Betzalel. Esto ganando bien i las paras me las pagan en forma djusta. Por agora tengo una kamareta de echar en el Otel Burnier, ke esta enriva del magazen. La foto ke te esto adjuntando esta travada en el tepe del otel, djusto enfrente de la plaza prinsipal de Osorno. Esto mirando para irme a otro lugar ande morar, ama no egzisten munchos. Ay una sinyora almana ke da pension, ama komo no me plaze lo ke giza, vo a kontinuar a buskar. Aki vino djente de la Alemania para lavorar komo kazalinos. En otras sivdades ay franseses, italianos i suizos.
Vide una foto ke tiene eskrito detrás lo ke me esta paresiendo es lo ke el tio Jacques le aresponde a mi padre a una kestion ke él le izo: “…me estan propozando mujeres para kazarme, ama ainda no me plaze dinguna. El patron del magazen ande lavoro me invito a komer a su kasa i kiere ke enkontre una mansevika estamburli, prima de su mujer. Te vo a kontar después lo ke akontesio”.
Lo ke akontezio fue ke el tio mando a Turkia la foto de la ijika sefaradí ke le presento su patron. La tengo en mis manos. Las mujeres en akeyos anyos se pintaban los mushos en demazía i la ke tenia la boka grande le paresia ainda mas grande. Mi padre, ke le plazia azer shakas (bromas) le metió de nombre “La petit bouche”. Ansina la yamaba, ama la vedra de la istoria fue ke el tio estava enamorado de Amelia, una ermoza mujer ke konosio en Santiago, komo lo konti en la gazeta El Amaneser de febrero 2012.
Ay un buen karar de fotos en ke el tio está djunto a diferentes djovenes kon los ke fraguo amistades, entre eyos Mario Recordon, ke se izo un afamado arkitekto. Se ivan de promenades a Puerto Montt, Valdivia i los lagos del sud de Chile. Ay fotos del tio eskiando en el volkano Osorno. En una esta vistido de basketbolista, deporte ke le plazia djugar en el ekipo de la Union Espanyola.
En otra letra eskrivio, “…komo este pays es un largo i estrecho pedaso de tierra, ke parese a un tren, kreyo ke uniko en el mundo, es fasil ir de un lugar a otro i todos muy ermozos. Dos de mis amigos ya se merkaron otos Ford, ansina mos aretamos ande mos da la gana. Esto viendo ke aki ay más luvia ke en Estambol. Tambien no me olvido de los teretemblos komo los de la Turkia. Akontezio uno muy grande ke desho a la sivdad de Chillan embasho. No kedo piedra enriva de piedra. Komo se paso en la noche murieron miles de personas, ke les kayeron las paredes de las kasas enriva en durmiendo…”
Todo no le afito de primera al tío en el pays. Kuando lo entrevistó el profesor de la Universidad de Chile, Mario Matus Gonzalez, para el livro “Vivencia de los sefaradís en Chile”, publikado en 1993, kontó esto: “Kuando estava en Osorno los almanes se vistian kon uniformes nazistas i azian desfiles por las kayes de la sivdad. En una okasion arondjaron piedras al magazen ande yo lavorava porke savian ke apertenesia a un djudio. Desde ese momento no me dieron ganas de saludar en alman a los ke venían a merkar. Estando en Santiago me iva al jurnal “La Opinion”, ke informava los akontesimientos de la gerra i kaji siempre avia pletos, kon golpes, entre los proaliados i los pronazistas; desharon de molestarme kuando vieron ke me inyervava presto i me dizian “malas pulgas”. Kuando se eskapó la gerra, arivaron refujiados djidios a la sivdad de Los Angeles i le di un shamar, entre ojos i mushos, a un rikinyon ke les estava gritando para ke no se kedaran en este payis”.
Chile estuvo entre los últimos payises del mundo ke rompieron relasiones kon el Aksis Alman-Japones. Avia munchos pronazistas en el poder ekonomiko i politiko, diplomatikos, armada, eskolas, medikos, jurnalistas, djunto a una grande kolonia almana i espiones del Treser Reich. Endemas de un partido nasionalsosialista kon un diputado en el Parlamento.
En arivando a Chile mis prodgenitores, la “vivencia” ke tuvieron en el payis fue diferente. La Segunda Gerra Mundial se avia terminado. Por esto mi padre, kuando lo entrevistaron para el mismo livro ke nombri, konto ke “nunka me molestaron en Chile por ser djudio i kon la djente del payis siempre estuve bien”. Pronto se sintió kontente de arivar a este lugar ke se topava tan leshos de la Turkia, ama ke tenia munchas kosas paresidas, komo le avia eskrito el ermano. Las letras i fotos ke aresivio de mi tio, entre 1931 i 1948, fueron la razon prinsipal para ke mi padre kon la famiya se vinieran de Estambol a Santiago. Muy presto también él konosio la atavanada jeografia ke tenia el payis, kon sus lagos, volkanos, ríos. Kaji no le kedo kanton por vijitar, fina ke desho la buena vida el 2000.
Notes
1. Hernan Rodríguez Fisse was born in Santiago de Chile in 1950, his father being born in Edirne and his mother in Istanbul. Both families descend from Jews exiled from Spain in 1492. They emigrated to Chile in 1949. He has a degree in Public Administration from Universidad de Chile and a graduate degree in Journalism from Catholic University. He is a Master of Arts in Political Science and a Doctor in International Relations. He teaches international business and business negotiation and conflict resolution at the Universidad de Chile, Universidad de Santiago, and Universidad Federico Santa Maria. He is Director and Editor of the Art, Science and Literature magazine Zejel and a permanent Collaborator of the magazines El Amaneser of Istanbul, Aki Yerushalayim of Israel, Foro of Mexico. He has been a leader of the Sephardic community of Santiago for the past thirty years and at present teaches ‘djudezmo’ to the members.