Sivdades a la fin del mundo
De
Hernán Rodríguez Fisse1
Vide tempanos [icebergs] komo los ke undieron el Titanic. Esto akontesio en un viaje en vapor ke ize entre las sivdades chilenas de Punta Arenas i Puerto Montt, atravesando el Cabo de Hornos. El kapitan me dio la permision de estar djunto a él, en el momento ke kondusia el timon entre los monturos de buz. Si se yerrava kon la manevra, agora no podría kontar esta istoria. Fue demaziado emosionante, aunke estar en un terretemblo es algo más duro ke mos depara la naturaleza, porke indemas tienen el faktor de sorpresa.
Me fui a Punta Arenas en 1972, invitado a kaza de una kamarada de la universidad. Su padre lavorava para la Ganadera Tierra del Fuego, la empresa ke kitava la lana a los kodreros para eksportarla a munchos payzes, el prinsipal la Ingletierra. Kuando estava por eskapar mi vijita me izo esta kestion: Vamos alkilar un vapor para ke los ovreros ke vinieron por la temporada de treskilar puedan tornar a la isola de Chiloe. Keres viajar kon eyos? Komo mis ganas de aventura eran grandes, presto le arespondi ke si. No tenia haber en estos momentos en lo ke me estava metiendo.
La motonave “Valdivia” era un vapor para tashidear merkaderias, ama no pasajeros. Al suvir mos davan a kada uno kolchon i una manta, para echarmos en el ambar. La komida se aparejava en un grande teneke, se azia una fila i mos ivan inchendo el plato de patatas i kodrero. De los bogos de los ovreros “chilotas” salieron ridomas de likor, merkadas kon lo ke ganaron en dos mezes de lavoro. Unos se metieron a djugar a las kartas, al “truko”, otros a bever i echar lashon. De pronto uno se inyervo i le dio un shamar al ke tenia al lado, al kaer en basho kito un kuchiyo ke tenia ariento del kalzado i se lo enfinko en la pacha. Presto los separaron. El gizandero se suvio enriva de la meza de komer i les grito: “En mi kamareta de echar i en la de mi ayudante vos estan asperando la Chela i la Maria para ke estesh todos kontentes kon los servisios ke vos puedan azer”. En un punto se alevantaron unos vente, kon las paras en la mano i formaron una fila delantre de kada una de las puertas, ande las mujeres se amostraron solo kon shalvares i sostienes i una sonriza en la kara.
Kuando se izo dodje de la noche, amataron las luzes del ambar i kada uno se tenia ke echar en el kolchon i kuvijarse kon la manta. Me meti un chapeo de lana, dos pares de kalsas, pulover, veston i manto. Solo dormi una ora i me desperti entezado. Era la primera noche i ainda mankavan dos más. A las sesh de la demanyana bevi un kafe i fui al lugar ande el kapitan estava tomando su dezayuno. Se adjideo de mi situasion i permetio ke me echara en la poltrona de su buró, para durmir fina ke arivamos al porto. De este modo pude ver los tempanos, la segunda noche del viaje.
De dia, desde la kuvierta, los paizajes eran de una ermozura unika. Pasimos por la “angostura inglesa”, ke tiene la anchura djusta para ke entren los vapores. Kada nada los restos de algún naufrajio se divizavan en la mar. Despues meldi los nombres de unos sien vapores ke se undieron al azer la traversia entre los oseanos Atlantiko i Pasifiko. La mayoría antes de ke se fraguara el Kanal de Panama. Avian, mas munchos, ingleses, espanyoles, almanes, danezes, fransezes, italianos i suedos. En el Golfo del Corcovado se meneo tanto el “Valdivia” ke dimos atrás todo lo komido. Fina ke arivimos sanos i salvos a Puerto Montt mi uniko alimento fue un poko de agua.
Trenta i kuatro anyos despues torni a Punta Arenas, en un viaje mas repozado, kon mi mujer i viajando solo en avión. Fue la okazion de konoser las afamadas “Torres del Paine”, kon turistos venidos de todas partes del mundo i la “Cueva del Milodon”, morada de este animal de la preistoria. Kaminando por la kaye Bories vide el progreso de la sivdad i las mansiones de los rikinyones trokadas en muzeos.
A la okazion de ese viaje, kontinuimos a Ushuaia, la sivdad mas austral de los arjentinos. Asigun el Travel Channel, aki se topa uno de los mijores muzeos karselarios del mundo. Vijitimos el lugar ande arivaron kriminales arematados. Entre las istorias ke mos kontaron avia la del “Petiso Orejudo”, un asesino ke le dio muerte a kuatro i a munchos mas feridos; kuando arondjo el gato de la prizion a la kaldera buyendo, los otros prizoneros lo aharvaron fina matarlo. Azian lavoro forsado para kayentar la prizion: kortar lenyos en la montanya el dia entero, kon o sin inyeve. Para yevarlos de la prizion al lavoro, unos 25 kilometros, fraguaron un tren chikitiko, kon makina de vapor, ande se asentaban de dos en dos. Fue konsiderado el tren más austral del mundo. Izimos el mismo viaje, ama komo turistos. Ainda podíamos ver tronkos kortados por los prizonieros. Kuando se alevanto este lugar en 1902, en Ushuaia kaji ke no tenian djente. En 1947 el governo dio orden de no kontinuar kon esta prizión i azer kon eya un muzeo. Meldimos kartas ande los prizoneros se keshavan del frio i la soledad del lugar. Ay paredes ke mantienen komo las desharon en akeyos anyos. Mos se izo la piel de gayina.
Tengo en mis manos un livro eskrito por Ricardo Rojas, rektor de la Universidad de Buenos Aires , ke en 1934 lo embiaron egziliado a Ushuaia por aperteneser al partido politiko Union Civica Radikal. El konta del abandono en ke estava este lugar, de su jeografia, el rovo de las tierras a la poblasion orijinal, los onas, de los bushkadores de oro, navegantes. Es una muy interesante istoria fueguina kon el título de “Archipielago Tierra del Fuego”. Otro livro ke kale meldar es “La Patagonia Tragica” de Jose Maria Borrero: “Los indios ambrientos van a matar los kodreros para alimentarse”. Los rikinyones, patrones de las estansias, enkontraron en la solusion final, asesinar a los indios, para ke no se komieran los animales ke les davan la lana, ke vendían en el merkado internasional.
De la trajedia de ayer al turismo de agora. Navegar por el Canal Beagle i arivar a Les Eclaireurs, el faro del fin del mundo de la novela de Jules Verne, es una de los promenades mas ermozas ke se pueden azer. Los turistos venidos en kruzeros de Evropa lo primero ke demandan, al arivar a Ushuaia, es vijitar el faro i las isolas de los Pasharos i de los Lovos. Kuando se aze noche, los bares, restaurantes, kafes, kazinos, se inchen de los viajeros kontentes de toparsen a la fin del mundo. El fruto de la mar ke mas demandan es la centolla i la karne de kodrero gizada en el fuego kon lenyos.
Punta Arenas i Ushuaia: dos destinos turistikos diferentes, ama los dos sierven para anchear la kultura i ver la forma en ke los ombres fraguaron sus destinos kon una naturaleza muy poko amistoza.
Hernan Rodriguez Fisse. Santiago de Chile. zejelchile@gmail.com
Notes
1. Hernan Rodríguez Fisse was born in Santiago de Chile in 1950, his father being born in Edirne and his mother in Istanbul. Both families descend from Jews exiled from Spain in 1492. They emigrated to Chile in 1949. He has a degree in Public Administration from Universidad de Chile and a graduate degree in Journalism from Catholic University. He is a Master of Arts in Political Science and a Doctor in International Relations. He teaches international business and business negotiation and conflict resolution at the Universidad de Chile, Universidad de Santiago, and Universidad Federico Santa Maria. He is Director and Editor of the Art, Science and Literature magazine Zejel and a permanent collaborator of the magazines El Amaneser of Istanbul, Aki Yerushalayim of Israel, Foro of Mexico. He has been a leader of the Sephardic community of Santiago for the past thirty years and at present teaches ‘djudezmo’ to the members. - See more at: http://www.sephardichorizons.org/Volume5/Issue1-2/Fisse.html#sthash.b01ZkLdg.dpuf