Konsierje Asesino
de Hernán Rodríguez Fisse*
Kontare una istoria vedradera ke les akontezio a la ermana de mi padre, la tía Ida Rodriguez i a su marido, el tío León Behar. Los dos vinieron a este mundo en la sivdad de Edirne, Turkia. Tuvieron su boda en Paris en 1925 i moraron en la kapital francesa fina 1948, kuando emigraron a Santiago de Chile kon sus dos ijos i una ija. Pokos anyos después de su arivo alkilaron un apartamento en la kaye Estado, kenar kon Huérfanos, los lugares más importantes del sentro de la kapital de Chile.
Me akodro de las visitas de alhad ke les azia en mi chikez, kuando tenía entre los sinko i mueve anyos, al apartamento de los tios, akompanyado de mis prodjenitores. Kon solo una kamareta de echar, el lugar tenía el boy de un kuti de kave. Ama la vista desde sus ventanas era magnifika; desde el etage syete, en akeyos anyos, era posible de ver el San Cristóbal i también el Santa Lucía, las dos kolinikas ke le dan una karakteristika unika a la sivdad de Santiago. Tambien se podía oyir la orkesta ke djugava en la Plaza de Armas, a dos puntikos de distansia.
La tia les aparejava al ermano i kunyada el kafiko a la turka, a mi me dava sharope de vishna kon tishpisti de muez, ke lo gizava de maraviyas. El djuntamiento me plazia porke oyia dos linguas: el ermozo djudezmo mesklado kon franses ke avlavan los grandes.
Un dia sintimos el sonete, el tio León miro por el ojiko majiko de la puerta i mos dize: “No ay espanto, es Robert, el konsierje, ke viene a ver ke le akontese a la elektrisidad del banyo ke no se kiere amatar”. Entro Robert i en mi chikez vide un jigante de persona, kon muncha kara de alman i komporto elegante. La alkunya Haebig no deshava duda de su orijen de algún lugar de la Almania. Mezurava kaji dos metros i su mirada no me plazio. Ama, los tíos estavan kontentes porke al konsierje le venía todo de la mano i parvenia a reparar las kozas del apartamento ke se charpeavan.
Los tíos se fueron sesh meses a viajar por Evropa i uno de sus ijos, el primo Edmond, ainda soltero, se kedo patrón del apartamento. Presto lo izo una “garçonniere” i kada nada traía mujeres para fiestar i algo más. En el tepe del batimento avia el restaurante Bellevue i enfrente de la kaleja Huerfanos el Bim-Bam-Bum, un chiko Moulin Rouge, kon vedetas chilenas i estranjeras. Mal no lo puedía pasar mi primo en medio de la “bohemia santiaguina”.
Kuando los tios tornaron de su viaje, el konsierje les informo todo lo ke se paso kon su ijo en el apartamento. Komo eyos kerian kontinuar a ir a la Evropa en kada anyo, el problema tenía dos solusiones: toparle una novia a Edmond, ke avia kumplido 26 anyos, para ke después de la boda asentara kavesa, o deshar el apartamento i trokarlo por otro en un kartier más repozado. Izieron las dos kozas. Si mi primo asento o no asento kavesa kon el matrimonio puede ser tema para un otro artíkolo.
Lo inkreivle de la istoria ke esto kontando viene agora. En 1961 los periodikos de Chile informavan ke Roberto Haebig era un asesino. El konsierje morava en la kaye Dardignac 81 de Santiago i se avia ido a la polisia a dezir ke en la guerta de su kaza enkontro un sementerio kon guesos de indijenas. Kavakaron la tierra i toparon dos puerpos. Lo ke akontesio iva a kedar fina aki, ama uno de los arkeologos ke vino kon la polisia topo unos antojos de antikuario (“lupa”) i la vedra salió en medio. Haebig asesino en 1959, kuando iva al apartamento de los tios, a un ombre ke lavorava kon antikitas i a un moso de kaza. La konfesion del konsierje fue esta: “Al antikuario lo mati porke no me pago una devda i el moso keria ser mi amante, un omoseksual askeroso, ke no tenía derecho a kontinuar kon vida”.
El asesino fue kondenado a prisión perpetual. Una de las gazetas eskrivio la istoria de Haebig, kon el titulo “El monstruo de Dardignac”: “Kuando el asesino era mansevo se fue a los Estados Unidos i se estuvo kuarenta anyos. En Hollywood lo kontrataron komo el doble de Boris Karloff, en los filmes “Frankenstein” i “La momia”, por su grande paresido kon el afamado aktor. Endemas rovaba en las kazas de los artistas. Fue apanyado por la polisia i rekluido en la prisión de Sin-Sing, durante siete anyos. Kuando torno a Chile se empleyó komo konsierje en un batimento del sentro de la sivdad. En 1960 toma por esposa a Maria Jesus Portales, una mujer de la aristokrasia chilena, bizinyeta del Ministro Diego Portales (1828). La kijo matar, ama la bala de la arma le salió yerrada”.
Anyos después de lo akontezido, la tía Ida me dezia: “Ernaniko, las pachas ainda me se menean komo en un terretemblo i el korazon me batea fuerte, kada vez ke me akodro ke deshavamos entrar a un asesino a muestro apartamento, kuando moravamos en el sentro de Santiago”.
Notes
*. Hernan Rodríguez Fisse was born in Santiago de Chile in 1950, his father being born in Edirne and his mother in Istanbul. Both families descend from Jews exiled from Spain in 1492. They emigrated to Chile in 1949. He has a degree in Public Administration from Universidad de Chile and a graduate degree in Journalism from Catholic University. He is a Master of Arts in Political Science and a Doctor in International Relations. He teaches international business and business negotiation and conflict resolution at the Universidad de Chile, Universidad de Santiago, and Universidad Federico Santa Maria. He is Director and Editor of the Art, Science and Literature magazine Zejel and a permanent Collaborator of the magazines El Amaneser of Istanbul, Aki Yerushalayim of Israel, Foro of Mexico. He has been a leader of the Sephardic community of Santiago for the past thirty years and at present teaches ‘djudezmo’ to the members.