El Piano
de Rivka Abiry*
Avlando de un piano, yo siempre me akodro ke al la siedra de muestra sala de kome se topava el piano.
Mi madre era pronta a ambezarme a djugar el piano i azerme alkansar a la altura de sus ekspektativas. A mi padre le azia un grande plazer si yo puedia djugar el piano komo mi madre, la kuala el adorava. Tambien si el piano no avía sido una parte fundamental de la identidad de mi madre, él pensia ke esto seria una parte importante de mi edukasión, de su ijika espesial. Mi madre estava muy a gusto en el piano, en una manera ermoza. Eya djugava el piano kon grasia i kon grande entuziasmo, kon su propia interpretasión. Yo era tresalida de oyirla djugar bailes, kansiones i kantikas de operetas.
En la dekada de los anyos 30, kualkera famiya ke puedía permeterselo, embiava a sus ijas a klases de piano para sembrar las semiyas de la kultura en sus korasones. Yo devia ambezarme a djugar el piano... ansina devia ser.
Kuando mi madre vido ke so kaprichoza, un dia me disho de asperar al Sr. Pavel ke devia darme lisiones de piano. Devia achetar. En asperandolo, kada vez me ize más inyervoza i impasiente.
Era un dia frío de Febrero. Sr. Pavlov ayegó. Me impresionó su vestimienta pezgada, su chapeo de kuero i su talia. Yo simplemente lo yami "Gospodin Pavel".
Mi primera impresión fue ke no tenía miedo de él. Él me ordeno de djugar un estudio i después de unos puntos, el anunsió ke tengo talento natural, un buen oído para la múzika i un buen ritmo.
I entonses, mis enkontros kon Sr. Pavel ampesaron. Tambien ampesi a disfrutar poko a poko de las melodias de las etudes muzikales, sin azer yerros. Mis esforsos de ser un buena estudiante izo Sr. Pavel feliz.
Antes de tomar lisiones de Sr. Pavel, sentía en djugando el piano komo avrir un rompekavesas matemátiko. Fina este tiempo yo nunka no gani un entendimiento profundo de múzika, mi korason nunka alkanso un sentimento de la belleza i de la resplendor de este arte, no senti toda su alegria, amor i pasion, nunka no fui kapachi de konoser la diferensia de la muzika de Bach, Mozart, Brahms o Beethoven, salvo sus portretos, sus frizuras en los livros.
Sr. Pavel todo tiempo era agradable, me enkorajava. El era un emigrante ‘Ruso blanko’, ke se fuyo de la Revolusion de Oktobre, de los Bolshevikos, alrededor del los anyos 1917-1920. Sr. Pavel era un sivdadino ke tenia solo un ‘Nansen Pasaporto’. Se avlava ke Sr. Pavel era en su kamino a ser un pianisto de konserto antes ke yege a Varna (Bulgaria).
Un día yo avía estado luchando kon una piesa de múzika kuando el disho:
"Te rogo alevantate i deshame djugar esta piesa por ti."
Él alevanto las mangas de su djaketa, ampeso a jugar. Yo nunka no avía oído a alguno djugar este tipo de múzika kon tanta pasion, tanto diferente de lo ke mi madre mos regalava.
El eskojo de djugar kon un sonido basho, la melodia akompanyada por su boz trankila demandandome:
"Sientes un trokamiento de tempo aserkandose de mosotros? Una furtuna?
"Oyes el relámpago i el trueno al orizonte?
"Oyes el poderozo viento djugando kon las ojas de les arvoles?
"Oyes los pasharos bushkando ande eskonderse de la luvia?”
Los dedos de Sr, Pavel tokando el teklado komo un danse de papiyones, transformaron la muzika en un ‘crescendo’. El sonido mesklado kon su boz, konvertieren la melodia, la armonia, i fue komo ke pintaron un imaje ke yo podia ver.
Despues ke el sonido alkanso a su altura, su boz entrando en un ‘descrescendo’ disho:
"Oyes ke la furtuna paso?
"Oyes las gotas de luvia kayendo sovre las ventanas?
Ves el bebé ke se esta durmiendo?
Ves a la madre asentada en la siya, kon las manos sovre su prostela repozandose?”
Al kavo:
"Se oye el silensio?"
Esto fue jenial. Pavel avrió la puerta para mí. Me avrio los ojos. Él me ensendió a eskuchar un sonido i de ‘verlo’, aunke la vizión es una palavra de objeto, el sonido es una palavra de evento. Ansi me amostro ver ke un evento akustiko se puede transformer a un imaje, a una koza visual, ke se puede tokar. Me ambezi a estudiar las notas, sus formasiónes, entender kualo es allegretto, andante, pianissimo, forte, fortissimo, de mismo kualo es tremolo, cadencia, legato o staccato i frazas demonstrando el trokamiento de la dinamika.
Nunka no fui un buena pianista, pero siempre pensi ke la múzika deve ser algo ke se puede gustar, no algo ke te sientes ovligado a azerlo por plazer o a favor de otras personas. Me desperti i en mi korason me se izo klaro ke kada piesa de muzika ke se djugava tenia de mismo una kara, una vista, komo un livro kon ilustrasiones.
En estando en la eskola sekundaria, pensava ke yo sólo estava ayi para komplaser a mis padres. Pero esto fue sólo para mí i ke las lisiones de Sr. Pavel me trokaron. Grasias a Sr. Pavel alkansi de entender la belleza i la ermozura del arte de muzika.
Fina mi último anyo de sekundaria djugi el armonio de la orkestra juvenil de muestra eskola.
La ultima vez ke me enkontri kon Sr. Pavel fue el 30 de Agosto de 1939, elejido para ser el día de la fiesta de graduasión de las 8 grado klasas de muestra Alma Mater. Los partisipantes fueron los elevos, los padres, los maestros i las personalidades de muestra sivdad en Varna, Bulgaria. Sr. Pavel fue entre los invitados.
Mientras ke la fiesta de graduasion es un momento de orgulio para kualker estudiante, para mí fue un día espesial.
El día de graduasión finalmente avía yegado; se avrio la sala, i después ke las últimas notas de muestro repertorio, la Overtura de William Tell de Rossini, fueron djugados, el konduktor, Sr. Kostantin, dio las grasias al publiko. Este día él también devia retirarse. Despues resivió su diploma i un ramo de flores de sus elevos.
Antes ke el orkestro devia djugar el imno nasional bulgaro, el direktor de muestra eskola se alevantó de su asiento i ayego enfrente de Gospodin Pavlov, ke estava asentado en el primero rango de la sala i le murmuro en su oreja. Sr.Pavlov se alevantó, se asento en frente del piano i ampeso a djugar el Concerto 2 de Chopin. Esta piesa muzikal, djugada kon la virtuozidad ekstraordinarya de Sr. Pavlov, kavzo una grande ovasión del públiko i fue saludada kon alegría i admirasión.
Nunka en mi vida no estuve tan feliz i orguyoza de ser uno de los alumnos del Sr. Pavlov. Nunka no oyi esta múzika ermoza, nunka no avía antes eskuchado la armoniya do estos sonidos.. Fina oy me akodro de los dedos del Sr. Pavlov bailando sovre las tushes del piano. Ké alegría para mí. Kualo puedo dizir… me mankan palavras. Mientras ke la fiesta de graduasion es un momento de orgulio para kualkar estudiante, para mí fue un día espesial.
Sr.Pavlov fue eskojido de ser el mueve konduktor de la orkestra.
Para mí este momento de alegría fue muy kurto, ya ke al dia sigiente ampeso la Segunda Gerra Mundial. Se izieron varios kambios drástikos en las vidas de la populasion en el mundo. Sr Pavel partio a los Estados Unidos ande bivia su ijo i yo kon mi famiya fue ovligada de salir de Bulgaria i tomar kamino a Teherán, Irán.
Pero una koza es sierta .Yo nunka fui una buena pianista, ma asta el día de oy me enkanta irme a konsertos, siempre ke puedo, espesialmente kuando un pianisto es el solisto.
Tiene el silensio un sonido?
* Rivka Abiry is a long term contributor to Sephardic Horizons. See the recent article about her by Jane Mushabac in Volume 7, Nos. 1-2.”The Phenomenon of Rivka Abiry.”