Mirar el kafe, meldar el futuro
de Rivka Abiry*
Oy sera uno de estos días en ke inkluso mi ke nesesitara un kafe.
Esto es un sujeto ke no se puede enkontrar en los periodikos, ma es interesanto i vale la pena de avlar de las endivinas ke fraguan kon la rikesa de su imagination elegantes versiones sovre el mirar el kaffe. Bushki en el Internet i topi esta tema ke vos esto presentar.
Ser sorprendidos, pero kon este artíkulo kero avlar sovre mis tiempos, anyos de chikes, de mi vida en Bulgaria de Varna. Aki ay fotos de mi kalle en el sentro de la sivdad de Varna, el puerto mas grande de la Bulgaria. Vos kero kontar kon la ayuda de mi assistento, el nombre de la kaya ande bivimos. Mira el portrato ariva del nombre de muestra kaleja. ke fue fotografiado antes de un mez kuando mi inyeto vijito la Bulgaria
Antes de muchos anyos mi familia teniamos un apartamento en Varna (Bulgaria) en la kalle Knyaz Batenberg (komo fina agora se ve en el foto ariva). La muestra kaza estava al borde de la kalle Ferdinand i estava no lejos de la kalle Zar Boris, la kalle prinsipal de Varna, el porto lo mas grande de la Bulgaria. En frente de mosotros bivia el papas armeni, i unos kuantos passos lechos de ayi estuvo la tienda del shastre armeni Arshak Zakean. Para mi ermano i mi las grandes tisheras del shastre eran el simbol de egzajeration. En esta kalle bivieron muchos de las konosidas de mi abuela ke las vijitavamos kon mi ermano. Mi abuela ayi despues de disfrutar de una kupa de kafe, se deshava mirar de la tia la taza de kafe ande se arrekojavan los depositos partíkulares del kafe. Era la tia kapazi de ver de los depositos del kafe el futuro? Saver lo ke va parvenir mañana o en el futuro serkano a menudo parese una fantasía. Durante mucho tiempo, la gente pudian kon diferentes manieras ser kapazi de azer previsiones i predizir eventos futuros. Una forma de aserkarse a este objetivo es leer los depositos del kafe. Aunke no tiene basas sientífikas solidas, se ofrese una grande oportunidad para los amantes del kafe.
La lektura de los depositos del kafe, en el fondo de la taza de kafe tambien llamado ‘Kaffeedomantie’ es bastante komún, espesialmente en el sud i sudest de Europa, del Balkan. Por lo tanto, oy en día tambien, es un pasatiempo serioso, espesialmente para las mujeres en Turkía i otros países del Oriente. En estas kulturas, es mucho mas ke un pasatiempo i, a menudo se selebra komo grandes dezisiones o empresas para predesir el futuro. Es importante leer preguntas sobre el futuro ke deven responderse desde los depositos de kafe antes de komenzar la interpretasion. Mientras ke en China se pudian interpretar el futuro de las ojas del te en el futuro durante mucho tiempo de una manera similar. Lo ke era konosido komo la ‘tasseographie’, vinieron los depositos del kafe i la lectura en esto, donde los otomanos fue una arte konsignado. Despues el meldar del kafe se presento por primera vez en el siglo 14 desde su origen era la region de Kaffa, ke se enkuentra en el sudeste de Etiopía a Arabia, la sivdad registrada Mocha en Yemen komo la kapital del kafe. A partir de aki, la lektura de los depositos del kafe se estiro pronto. Fue, principalmente, un pasatiempo de mujeras aedadas.
La mejor manera de leer los depositos de kafe, espesialmente despues de disfrutar de una infusion direktamente en la taza de kafe turko, ya ke estas beviedas deshavan una grande kantidad del sumo en la taza. Pero inkluso despues de tomar un kafe los partíkulos sedimentos finos de kafe pueden akumularse en el fondo, desde donde se pueden leer símbolos i predesir su futuro kon la ayuda del orakulo de la taza.
Si keres meldar los simboles de los depositos del kafe deve tomar el tiempo de desfrutar del aroma del kafe. Si la kupa esta vasia se puede ampesar kon la interpretasion pormode despues ke del kafe ke se bivio keda una chiko deposito.
Para interpretar i dar un sentido logiko a las diferentes figuras ke paresen en el fondo de la taza, es nesesario un alto grado de konsentrasion i tener una grande imaginasion e instinto. No obstante, tambien se puede echar mano del dikionario de símbolos mas komunes:.
Unos eksamplos :
Ventana : Revela buena suerte, si esta avierta; i, si esta serrada, es signal de mala suerte.
El kuerpo de la abeja: representa buenos augurios, buenas notisias i posibilidades de azlaha.
Eskaleras: Anunsia prosperidad i mejoras ekonomikas, lograr en la vida todo akelo ke se pensava el konsultante.
Montana grandes: obstaklos en la vida.
Tchimene: algun sekreto esta a punto de salir a la luz.
El barko: muy pronto se va resivir una vijita inesperada.
Kaza: seguridad i trankilidad interiores dentro de la kasa i la familia.
Korazon es amor, un annyo es kasamiento, una chanta es paras.
La division de la kupa tiene lugar en su sektion sentral. En otras palavras, ay tres areas ke determinan la kalidad de un símbolo: asa, borde delantero, i area inferior.
. Area izkierda = tiempo presente
. Area derecha = Hora futura
. Area de manejo = eventos relasionados kon la vida amorosa
. Area del borde delantero = La rikeza importa
. Area de la kupa inferior = Asunto familiar i hogareñyo
Me alegro kuando topo una edada mujer ke save interpretar los depositos del kafe i la manera ke eja presenta adjusta i estira delantro nos oshos, kon kolailik, una entera larga istoria kon su rika fantasia de los smboles.
Ama si me kreo es una otra koza . . . . Un día, una adivina me amostro una abeja en el deposito de mi kupa de kafee. Al siguiente diya me modrio una abeja i sufrí una ataka dolorosa.
* Rivka Abiry z"l has been a long term contributor to Sephardic Horizons. See the recent article about her by Jane Mushabac in Volume 7, Nos. 1-2.”The Phenomenon of Rivka Abiry.”