Livro obtenivle en forma ‘ebook’

PREFIERO CHILE por Hernán Rodriguez Fisse

Ediciones El Mercurio, 2017

Analiz del Livro por Rachel Amado Bortnick ¹

"Necesito tu ayuda. Quiero que hables con nuestros padres y les digas que no me quedaré en Paris, pero tampoco regresare a Estambul. Prefiero Chile. Pero, por favor, quiero que entre ambos asumamos un compromiso. Lo que mas preocupaba a nuestro padre era de quedarse solo. Por eso, si algún día tu decides de partir de Turquía y establecerte en lugar que quieras - tienes todo el derecho de hacerlo - prometámonos que no los dejaremos solos y nos traeremos a nuestros padres a tu hogar o al mío. ..." (Prefiero Chile p. 101.)

Estos biervos los eskrivyo Jacques Rodrigues, el protagonisto del livro Prefiero Chile, en oktubre de 1935 en Paris, en su letra a David, su kerido ermano i companiero inseparable en Estambol.

Ma deke dize aki ke el "prefera Chile" ? Kualo savia de Chile? Vos kontare.

Kronika de Jacques Rodriguez, su famiya, i sus viajes

Jacgues avia nasido en Estambol el 15 Augusto de 1914, " una fecha historica por la inauguracion del Canal de Panama y el inicio de la Primera Guerra Mundial ," asegun mos dize el autor. (p. 16) Era el ijo chiko de Isaac i Victoria Rodrigues ke, kon sus ijas Ida i Becky i rezin-nasido David, avian pasado de Edirne a bivir en Estambol.

De chika edad Jacques fue kuriozo de saver i konoser el mundo. (Era "fuyido de la kuedra," komo dirian en Izmir!) En djenayo (enero) de 1925 Ida se va a Paris (en treno Orient Express) para kazarse ayi kon un ombre ke no konosia. Dos anyos despues, Becky tiene proposision de kazarse en Brazil kon un primo del padre. Aze aze el largo viaje ayi, a ma no le plaze el novyo propozado, i se abolta i eya a Paris i ayi se kaza kon un ashkenazi. En 1929 sus padres viajan a Paris, tambien kon el Orient Express (tres noches i dos dias) a ver sus ijas i inyetos, i kedan ayi un mez. Todo est tiempo, Jacques, ke ya savia fransez porke estudiava en la eskola de l'Alliance, sonyava de ver Paris, la famoza "sivdad de luz." Finalmente realiza su dezeo a sus 16 anyos de edad. En oktubre de 1930 viaja en un barco carguiero (vapor de kargo) asta Marsilia, i de ayi por tierra a Paris.

Este viaje va empesar a trokar el destino de Jacques. Al dia de su arivo en Paris, el se topa en la inaugurasion de la Ekspozision Kolonial Internasional. La vijita tres vezes, i se ambeza muncho sovre los varios paizes del mundo. (El livro mos da deskripsion detaliada de lo ke vido, sintio i gosto ayi.) Lavoro i se kedo unos mezes, i en augusto de 1931 aze la konosensia de un diplomato i eskritor de Chile, i le nase un grande dezeo de konoser este pais. Kuando abolta a Estambol, David le demanda deke kere irse a Chile, el "'culo' del mundo, la finis terrae." Jaccques le eksplika ke " la exposición colonial le habia mostrado la existencia de todo un mundo por conocer. Que ahí estaba el futuro y la esperanza, y que Europa ya era parte del pasado..." (p. 34)

Jacques viaja a Chile kon el vapor "Reina de Pacifico" verso la fin de 1931, yegando al porto de Valparaiso despues de pasar por el Kanal de Panama, i eskalas en Callao, Peru i en Antofagasta, Chile. (En Callao se salva de una situasion difisil grasias a su español antiguo o ladino, el djudeoespanyol.) Pasa serka un anyo i medio en Chile - en primero en Valparaiso i despues en Santiago. Konose djente buena. Tiene lavoro malgrado ke es tiempo de depresion ekonomika. Durante este tiempo tiene korespondensia kon su famiya en Estambol, mas muncho kon David. La situasion ekonomika lo ovligo a David de deshar su estudio de medisina en la universidad de Estambol i empesar a lavorar. Tambien kompleto un anyo de askerlik. Yego notisia ke Jacques deve prezentarse para el askerlik. Por esto, en marso de 1934 Jacque desida de aboltar a Estambol para azer su servisio militar.

Su va a Buenos Aires, Argentina, i da ayi viaja kon el Augustus, grande vapor de pasajeros, i yega a Genoa, Italia. Vijta esta sivdad, i Milano i Roma, i observa la vida debasho el fashismo de Mussolini. De Genoa viaja a Istanbul kon el vapor turko Ege. Su servisio militar tura solo tres mezes (meldaresh la razon) i Jacques goza de los pasatiempos, komidas, i mas en Estambol kon su ermano David, amigos, i famiiya. Su papa kere ke kede en Estambol, se kaze i arresente ayi, ma Jacques kere partir demuevo para Paris, i le promete a su padre ke nunka los deshara solos en Estambol.

Esta ves en Paris es ke le eskrive a David la letra avizandole ke el "prefera Chile" para bivir. I es lo ke aze.

Pasan anyos en Chile - Jacques lavora en primero en Valparaiso, i despues en Santiago, i Osorno. Se kaza kon Amelia en 1942, el mizmo anyo ke David se kazo kon Fortunee Fisse en Estambol, en la sinagoga Apollon.²

Despues de todo lo negro de la Segunda Gerra Mundial en Evropa, kon tiempo el resto de la famiya yega a Chile tambien. (Solo Becky desida a kedar en Fransia). En Avril 1949 arivan David i Fortunee kon Izakino, sus ijiko de 5 anyos. (El viaje de Estambol a Genoa lo azen kon el Ege, el mizmo vapor ke yevo a Jacques en la otra direksion en 1934.) Finalmente, en 1951 los parientes, Isaac i Victoria Rodriguez, yegan de Turkia, i ansi se realiza la prometa de Jacques i David a sus padres de nunka desharlos solos.

A David i Fortune les nase otrun ijiko en Santiago en1950 - Hernán - el ke va eskrivir, munchos anyos despues, la estorya de la famiya en el livro titulado Prefiero Chile .

Mas aya de la kronika

Komo ya savemos, en los anyos de esta estorya - 1930s a 1950s - uvo trokamientos i alborotos drastikos en el mundo. En kada paso, el livro mos deskrive komo estos tokaron de una manera o otra a la vida de Jacques i de su famiya. En Evropa uvo el dominio del fashismo i nazismo, la Segunda Gerra Mondial i la Shoa, i en Espanya la gerra sivil. En la Republika Turka, las munchas reformas de Ataturk transformo radikalmente la sosiedad, i aun ke el pais no entro aktivamente a la gerra, los djudios sufrieron de la taksa diskriminatoria yamada varlik vergisi. Se fondo el estado de Israel i empeso la grande aliya de Turkia. El autor integro esto todo, i munchos mas evenimientos, en la estorya personal ke mos konta, lo ke da al livro un aspekto edukativo tambien .

Ademas de evenimientos emportantes, el livro mos da detalyos de vida en los munchos lugares ande bivio o vijito Jacques. Deskrive sivdades, kon sus kalejas i edifisios, vistas naturales, i pasatiempos - filmos, sinemas, teatros, muzika, jurnales, livros, klubes, i mas - vistimientas, komidas, uzos i tradisiones de la djente (i espesialmente de los sefaradim.). Saviash kuando empesaron apareser los livros Penguin Books (o "pocket books" en inglez), o kuando Josephine Baker estuvo en Estambol? Aki esta la repuesta. En kurto, Prefiero Chile mos yeva a los anyos de 1930s, 40s, i 50s komo en un "tunel de tiempo" en los munchos viajes i eksperiensas de Jacques Rodrigues.

Meldi Prefiero Chile tres vezes, kada ves kon mas grande plazer - en priemro kaji un anya atras, i despues para preparar este raporto espesial para Sephardic Horizons.. La estorya es muy enteresante, komo es tambien la manera ke la konta el autor, Hernán Rodriguez Fisse. (El livro gano el premio Revista de Libros del jurnal El Mercurio en Chile en 2016.) I ademas, aunke esta eskrito en español castellano , lo pude entenderlo fasilmente solo kon mi djudeoespanyol de Izmir. Las frazas aki son simples i klaras (no entrevinkadas komo en otros tekstos en esta linga) i los kapitolos son kurtos (tiene 64 kapitolos en 194 pajinas.)

Los ke meldamos El Amaneser, la revista mensual en djudeoespanyol de Estambol, ya konosemos los eskritos de Hernán Rodriguez Fisse ke aparesen ayi regolarmente, i savemos ke el tiene talento de kontar una estorya, i mezmo tenemos meldado ayi sovre algunos miembros de su famiya (sovre todo su papa i mama, David i Fortune) ke tanbien aparesen en el livro. Despues de meldar Prefiero Chile, me fui a mi koleksion de El Amaneser i meldi demuevo algunos de estos artikolos. Fue komo kontinuar a meldar lo ke paso kon la famiya Rodrigues despues de la estorya en el livro! (I esto es otra estorya!)

Si tengo una chika kesha es ke el livro no mos da muncha informasion sovre las mujeres de la famiya. Es de El Amaneser ke supe ke la madre de Fortunee (grand-mama de Hernán) era de Izmir, koma mi!

Ma esto no kita nada de la grande valor de Prefiero Chile, ke aparte de ser enteresante, bien eskrito, i edukatuvo, trata de un sujeto poko konosido - la emigrasion sefaradi a Chile. Espero ke un dia sera traduizido en otras linguas, a lo menos al ingles.

Entre mientres, savemos ke Hernan Rodrigues Fisse ya publiko un otro livro: Elie Alevy, La Marca de Auschwitz, i esta eskriviendo otro en ladino yamado "Viajar, Ke Mijor." Espero tener la oportunidad de meldar estos tambien. (Para mas informasiones, eskrivir - en ladino, castellano, o inglez - al sinyor Rodriguez-Fisse en: zejelchile@gmail.com. )

¹ Rachel Amado Bortnick is the founder and editor of the fascinating internet discussion group Ladinokomunita, which probably inaugurated and has definitely given a major impulse to the Ladino/Judeo-Spanish revival around the world, both by providing a forum for conversation, by standardizing spellings, and through its online dictionary, as well as its interesting subject matter.