Jerusalem: Elevo de su universidad
De Hernán Rodríguez Fisse ^*

Jerusalem 1984. Photo Source: BAFCO Tours.

Mientras me topava de profesor en la Universidad de Chile me arivo una letra de Israel. Era una invitasion de la Universidad Hebrea de Jerusalem. Me estuve en Yad Vashem, el museo del Olokosto de la sivdad de Jerusalem, en el mez de enero 1984. Todo lo gastado durante tres semanas, inkluido el bilyeto de avión de Santiago a Tel-Aviv, estava konsiderado.

Kual era el buto? Asistir komo elevo a un seminario de la Shoa, kon kamaradas i maestros venidos de diferentes payses. El ‘sponsor’ o mesenas de esta aktividad fue la Fundasion Vidal Sassoon. Mos ivamos a las klases por la demanyana, i por la tadre avia ke developar proyektos de investigasion, en el antika batimento del museo. Uno de los maestros kon los ke lavori fue Haim Avni, ke estava interesado en konoser la aktitud ke avian tenido los governos latinoamerikanos, para aresivir djidios antes i después del Olokausto. Kuando el profesor Avni vino a Chile para developar mas datas, le pude dar una ayuda para kontinuar tan importante investigasion.

Un dia me fui ande se topa la dokumentasion de los djidios ke fueron arondjados de sus kasas de Paris, enviados al Velódromo de Invierno, luego al kampo de Konsentrasion de Drancy i finalmente a las kamaras de gas. Vide ke avia sefaradís arivados de la Turkia a la sivdad de Paris i aretados durante la okupasion de los nazis. Topi famiya de la alkunya Rodriguez. De Esther Rodriguez dizia ke avia nasido en Adrianapolis (agora Edirne) en 1880 i deportada de Drancy a Auschwitz el 9 de noviembre de 1942. Eya era tia de mi avuelo Izak. De Joseph Rodriguez eskrivieron ke vino a este mundo en la misma sivdad en el 1900.

Anyos mas tadre, en un viaje a Paris me fui al bulevar de Grenelle i meldi lo ke avia eskrito en una chika plaka:

Entre los días 16 i 17 de julio de 1942, fueron aretados 13.152 djidios, deportados a Auschwitz i matados. En el Vélodrome d´Hiver, ke se topava en este lugar fueron deshados en kondisiones infraumanas . . . . .

Antes de salir de la Fransia los mandaban a un kampo de konsentrasion en Drancy.

Para tomar repozo entre klase i klase en Yad Vashem mos ivamos kaminando ande se topavan los arvoles de los Djustos de la Umanidad. En kada uno se enkontra el nombre de la persona ke dio una ayuda para salvar djidios. Desde este lugar ay una ermoza vista de Jerusalem. Para konoser un poko mas de la sivdad fue menester ke me kedara una otra semana. Me kontenti muncho kuando merki por trenta shekel viejos el jurnal La Luz, de su direktrisa en kapo Rosa Bueno. Meldi el 2 de enero de 1984 esto:

Los pessimistos en la ekonomia, ke preveden todo preto, se esklaman ke enterval del anio 1984, pujara el numero de los ke kedaran sin lavoro a serka de 50 mil batales. Arrivaron a este grande chifro, en aziendo el kuento ke oy en dia ay 12 mil batales. Enterval del anio pujara este número i serán 24 mil almas sin lavoro. En tomando en konsiderasion ke non se ressevira nuevos empiegados i ke kitaran del lavoro otros miles del sector particular i governamental, se kreen ke los batales pujaran ainda mas.

Poko tiempo después este jurnal no vido mas la luz. De jurnalismo en ladino solo kedo el Aki Yerushalayim.

Kuando el seminario eskapo me fui a Petah-Tikva. En esta sivdad moravan la tia Alegra i el tio Musa. Eya era ermana de mi madre, kuatro anyos mas chika. Izieron aliá en 1970 desde Estambol. Kada nada se eskrivian letras ande se kontavan de sus vidas. Kuando el tio Musa me avrio la puerta de su apartamento, le disho a su mujer: “es la misma kara de tu ermana Fortunée.” De grande valor lo ke avlo, porke en este tiempo yo no me arapava la kara.

Me dieron la kamareta de echar de mi primo Eliezer, ke se avia kasado. Los tíos me amostraron muncho karinyo, ansina komo el perriko Jumi, ke me saltava enriva. La tia gizava tan gostozo komo mi madre las komidikas sefaradies. Las borrekas de berendjena eran para arepetirse jaloshientas veses. Musa estava pensionado, le plazia kaminar, endemas de meldar periodikos i gazetas para mantenerse informado de lo ke estava akontesiendo en el mundo. Por las noches mos metíamos endjuntos a ver la televisión. Me davan a gostar pedasikos de halva. El tio komia dátiles a eskondidas de la mujer, por la diabet le estava defendido. Merkava bilietos de los djugos de azardo, la tía se metia a reyir i le dezia: “kualo te ganastes, la de Hananel en papel?” Musa le arespondia: “no seas espezutina mujer!” Las mismas frazas ke yo eskuchava entre mi padre i mi madre.

En 2009 viaji otruna vez a Israel, en esa okasion kon mi mujer. En abashando del avión lo primero ke izimos fue ir a Petah-Tikva. Estuvimos toda una tadre kon la tía Alegra. Ama el apartamento no era el mismo, mankava el tío Musa, ke desho la buena vida en 1997. Do grasias al Dio ke lo pude konoser.

---

^* Hernán Rodríguez Fisse was born in Santiago de Chile in 1950, his father being born in Edirne and his mother in Istanbul. Both families descend from Jews exiled from Spain in 1492. They emigrated to Chile in 1949. He has a degree in Public Administration from Universidad de Chile and a graduate degree in Journalism from Catholic University. He is a Master of Arts in Political Science and a Doctor in International Relations. He teaches international business and business negotiation and conflict resolution at the Universidad de Chile, Universidad de Santiago, and Universidad Federico Santa Maria. He is director and editor of the Art, Science and Literature magazine Zejel and a permanent collaborator of the magazines El Amaneser of Istanbul, Aki Yerushalayim of Israel, Foro of Mexico. He has been a leader of the Sephardic community of Santiago for the past thirty years and at present teaches ‘djudezmo’ to the members.This article was specifically written for Sephardic Horizons.