Cuba i los Sefaradis¹
De Hernán Rodríguez Fisse²

Asentado en la terasa del otel Ambos Mundos, de La Habana, esto eskriviendo este artikolo. Los turistos venidos de los Estados Unidos vijitan kon grande intereso la kamareta 511, ande se kedava Ernest Hemingway para aparejar algunos de los munchos livros ke publiko. El lugar es un muzeo, ande se topa la kama i kozas personales del autor, entre eyas la makina de eskrivir, ande lavorava en pies, no le plazia asentarse; dizia ke ansina las ideas le venían mas presto. La mas afamada de sus novelas, “Por ken tanyen las kampanas”, la redakto en este lugar. Kon mi mujer mos kedimos en la kamareta 405 en febrero de 2017.

Vijitar la isola de Cuba era una idea ke tenia enfinkada en la kavesa desde muncho tiempo. Investigando la istoria de la famiya de los Rodríguez ke moravan en Edirne, deskuvri ke Cuba fue uno de los destinos eskojidos para emigrar, kuando la sivdad eskayo por modo de fuego, gerras i difikultades ekonomikas, al empesijo del siglo XX.

En Guanabacoa, a pokos kilómetros de La Habana, se pueden ver dos sementerios djudios, uno para los askenazim i al otro se van los sefaradís ke deshan este mundo. En el sigundo ay foyas kon estos nombres i las datas de sus muerte: Salomón Rodríguez Djerussi (1947), Jakobo Rodríguez Baruch (1960), Viktor Rodríguez Chiprut (1966), Moises Rodríguez Behar (1967), Matilde Rodríguez Adabo (1970), Raquel Rodríguez Rodríguez (1975), Jacobo Mizrahi Rodríguez (2004).

Deke elijieron Cuba para emigrar desde la Turkia? Kale rekodrar ke la Espanya pedrio kaji todas sus kolonias, entre 1810 i 1825, i solo les kedo Cuba fina 1898. La isola era el orgulyo de la Korona Espanyola i destinaron grandes fortunas para fraguar batimentos, mansiones, teatros, grandes kalejas. Izieron de La Habana, djunto a los kartiers de El Vedado i Miramar, una djoya para amostrar al mundo ke la Espanya no era menos ke la Fransia o el Imperio Britaniko. Los sinemas se yamavan igual ke en Madrid, komo el Aktualidades, Alhambra, Nasional. Lo mismo el prinsipal jurnal, La Diskusion.

La isola les azia rekodrar a los sefaradís akeyos lugares de la Espanya de ande los arondjaron en 1492. El amor por todo lo espanyol lo tenian ainda muy bivo. Avlando la misma lingua, pudieron desveloparse de lo mijor. En los primeros anyos de la emigrasion se izieron vendedores de kaza en kaza, tashideando la merkaderia kon si, en grandes bogos. Mas después avrieron sus propios magazenes i fabrikas. En akeyos anyos los proves de Cuba no se metían kalsados. Era una vestimienta muy kara, kada par se vendia entre 18 i 35 dolares. Los djidios izieron chikas fabrikas de kalsados para la djente del kampo, los kazalinos, i por 3 dolares los vendían komo pan kayente. Entre los djidios askenazim, yamados polakos i los sefaradíes, ke les dizian turkos o moros, djuntaron mas de ochenta fabrikas. Lavoravan de dia i de noche para azer la parnasa. Ansina los ijos ke les nasieron en Cuba pudieron edukarsen en las eskolas i la Universidad de La Habana, aresiviendosen komo doktores, avokatos, injenieros i munchas otras profesiones.

Komo se izieron algunas de las bodas entre los djidios? Entre los emigrantes avia más ombres ke mujeres. Uno de eyos, kon grande sehel, tuvo la idea de traer mansevikas en vapor desde New York, para kazarlas kon los djovenes de la isola. “Big chirej³, big business”, dizian los afortunados.

A kaji toda forma de salir adelantre se akostumbraron los sefaradís. Me kontaron la istoria de un ederneli aedado ke le plazia el raki, ama lo troko por el rom, el likor tipiko de Cuba. Komo vido ke a los kubanos les plazia beverlo, izo el “Bar Rodríguez” i endemas, en un kantoniko del negosio, metió a una mansevika, de lindas pachas i mijor trazera, a vender “habanos”, sigarros kon las markas más afamadas, komo los Cohiba i Montecristo.

A lo ke nunka se akostumbraron fue a los hurakanes. Kuando venia uno avia grandes destruksiones de batimientos, arvoles enbasho, otos patladeados, la elektrisidad kortada. El ke akontesio en 1926 konvirtio el kartier de El Vedado en un lago, entre la agua kaida de la luvia i la ke entro kon las olas de diez metros desde la mar. Fotolyos, kamas, mezas, pianos, siyas, salían de las kazas bailando enriva de la agua. La golor de podrido de la sivdad se mantuvo por varias semanas. La djente se kedo sin vestimientas, comida i una epidemia de peste izo murir a sienes.

La vida komunitaria fue muy importante. Formaron varias organizasiones, la primera fue la Kongregasion de los Ebreos Unidos de Cuba, la ke izo posivle de merkar el sementerio de Guanabacoa. Los sefaradís dieron orijen a La Buena Voluntad, ke se okupo de dar ayudo a ninyos i mujeres menesterozas. El Bikur Holim se izo responsavle de los hazinos i de dar sepultura a los proves. Mas después vinieron los klubes sosiales i esportivos. La Union Ebrea Chevet Ahim fue la fundadora de la primera eskola djudia, a la ke metieron el nombre Teodoro Herzl. En el sentro ke tenían en la kaye Santa Clara 19, en primero, i más después en Inquisidor 15, los sosios asistían a los servisios relijiozos.

En 1933 kon la diktatura del jeneral Gerardo Machado, la propaganda nazi penetro en el governo, impidiendo la entrada de los djidios ke estavan fuyendo de la Almanya. Anke Machado fue derokado, el antisemitismo penetro en la sosiedad kubana. Avia un periodiko, “Diario de la Marina”, dirijido por un espanyol falanjista ke publikava artikolos en kontra de los djidios. El kavzo mas dramatiko akontesio el 27 de mayo de 1939, kuando el vapor St. Louis arivo kon 937 refujiados djudios, desde el porto de Hamburgo, i se les defendió de abashar en La Habana; al tornar a Evropa murieron en el Olokosto. Los Estados Unidos también les impidió la entrada en sus portos. De este kavzo se tienen publikados varios livros i también ay filmos.

En 1952 Fulgencio Batista se tomo el poder por la fuersa i Cuba devino una sosiedad muy preta, ande las libertades de las personas se pedrieron. Siete anyos después el puevlo se alevanto en armas, kon su líder Fidel Castro, dando orijen a un muevo rejimen. Komo se estava en la epoka de la Gerra Yelada, Cuba kedó komo aliado de la Union Sovietika. La mayoría de los djidios del payis no aksepto el proyekto de sosiedad komunista i abandono la isla, deshando todas sus propiedades. El destino fue la sivdad norteamerikana de Miami. Otra diáspora en la istoria del puevlo djidio.

Konverso kon uno de los turistos norteamerikanos ke vijitan la kamareta de Hemingway: “So inyeto de uno de los djidios ke se fueron de Cuba en 1960 i me plazeria tornar a este payis, más temprano ke tadre”.

---

¹ A version of this article had previously appeared in El Amaneser.

² Hernán Rodríguez Fisse was born in Santiago de Chile in 1950, his father being born in Edirne and his mother in Istanbul. Both families descend from Jews exiled from Spain in 1492. They emigrated to Chile in 1949. He has a degree in Public Administration from Universidad de Chile and a graduate degree in Journalism from Catholic University. He is a Master of Arts in Political Science and a Doctor in International Relations. He teaches international business and business negotiation and conflict resolution at the Universidad de Chile, Universidad de Santiago, and Universidad Federico Santa Maria. He is director and editor of the Art, Science and Literature magazine Zejel and a permanent collaborator of the magazines El Amaneser of Istanbul, Aki Yerushalayim of Israel, Foro of Mexico. He has been a leader of the Sephardic community of Santiago for the past thirty years and at present teaches ‘djudezmo’ to the members.

³ shirej, del idish: akordo matrimonial.