Sujeto Neglijado: Los Sefaradim en la Shoa
De Rachel Amado Bortnick1
Era un dia grizo i friyo en 24 Marso de 2003, serka de Krakovia en Polonia, sienes de personas mos arekojimos en en el kampo de Asuchwitz-Birkenau, delantre del Monumento Memorial, para asistir en una seremonia de grande emportansa i emosion para los Sefaradim: la dedikasion de laja en djudeoespanyol en el monumento. Era el rezultado de serka 3 anyos de esforsos, lavores, i gastes de la organizasion JEAA (Judéo-Espagnol à Auschwitz), fondada i enkavesada del profesor Haim Vidal Sephiha i Michel Azaria de Paris.
El Monumento se avia instalado en 1967, una struktura de piedras masivas i eskuras, i delantre, en basho, una serie de 20 lajas grandes rektangularas, komo tombas, kada una inskrita kon un teksto memorial en una de las lenguas nativas de los 1.500.000 viktimas de este grande kampo de muerte Ma asta 2003 el djudeoespanyol (ladino), la lingua avlada por miles de sefaradis imprizonados i asasinados aki, no estava entre estas!
En el anyo 2000, Haim Vidal Sephiha, i sovrebiviente sefaradi de Auschwitz, i profesor espesialisto de djudeo-espanyol de Paris, fue invitado a Polonya para avlar en un programa de radio, i a esta okazion retorno a Auschwitz por primera ves desde su liberasion en 1945. Su korason pezgado kon sus memorias amargas, fue ferido una vez mas al ver ke el gran monumento no rekonosia su propria lengua natal, i la de todos sus keridos i de miles de sefaradim ke fueron matados aki. En kurto, esto fue lo ke avrio el kamino para la fondasion de JEAA, i despues de 3 anyos, a la instalasion de la laja en djudeo-espanyol.2
Esta laja remplaso la ke era en inglez (lingua ke no era nativa de dingun viktima del kampo), i la de inglez se topa agora aparte de las otras vente. El teksto es el mizmo en todas las lenguas. En judeoespanyol es: “Ke este lugar ande los Nazis eksterminaron un milyon i medyo de ombres, de mujeres i de kriaturas, la mas parte djudyos de varyos payizes de la Evropa, sea para syepre para la umanidad, un grito de dezespero i unas sinyales. Auschwitz-Birkenau 1940-1945.”
El dia de la seremonia de dedikasion era egzaktamente el 60en aniversario del dia en 1943 ke arivo en Auschwitz el segundo treno de Salonika, en 24 Marso 1943, kon 2800 djudios. De estos, solo 814 (584 ombres i 230 mujeres) fueron internados en el kampo de konsentrasion. Los otros, serka 2000 personas, fueron matados imediatamente en las kamaras de gas.3 De Salonik a Auchwitz, entre 15 Marso I 9 Mayo de 1943 uvo 16 “konvoyes” de trenos, kon 42.830 djudios, i djuntos kon los ke arivaron en Augusto, eran 45.659 de Salonik solo. En todo de Gresia i sus islas arivaron en Auschwitz 54.533 djudios4, esto sin kontar los sefaradim de otras partes de Evropa. Muy pokos de eyos sovrebivieron.
Deke, entonses, en el Monumento de Auschwitz no se rekonosio de su ora el djudeoespanyol komo una lengua de los viktimas? Deke es ke tuvo ke pasar 36 anyos i tantos esforsos para korijar la grave omision?
Este kavzo es, malorozamente, emblematiko de la mankura de konosimiento de la istoria i kultura sefaradi en jeneral, i de la destruksion de komunidades sefaradis en la Shoa (el Holokausto) en partikular, mezmo de parte de los ekspertos i espesialistos. Aunke en los kavos 10-15 anyos salieron a lus algunos livros de memorias de sovrebivientes sefaradis, i estudios sovre las komunidades sefaradis, estos son muy pokos al lado de la enorme dokumentsion - archivos, estudios, testimonyos de sovrebivientes, livros, i artikolos sin kuenta, muzeos, filmos, i mas - ke trata de las povlasiones ashkenazis eksterminadas en la Evropa oksidental, sentral, i oriental. Esto kavza ke munchos, entre eyos munchos sefaradim, malorozamente, tengan la yerrada empresion ke la Shoa fue un fenomeno de los djudios Ashkenazis solo. En realidad, se pensa ke unos 160.000 sefaradim5 se deperdieron, i kon eyos sus kultura i lengua djudeo-espanyola.
Entre los 6 milyones de djudios asasinados en la Shoa el numero de 160 mil puede kedar kuaje insignifikante. Ma para el mundo sefaradi, la piedrita fue igualmente grande ke la ashkenazi. Se destruyeron grandes i chikas komunidades sefaradis en Gresia, Serbia, Bosnia-Hersegovina, Kroasia, Masedonia, Trakia, i las islas del Mediteraneo i Egeo. Entre eyas kontamos Salonik (la mas grande komunidad, konosida kom “Madre de Israel”) Belgrado, Sarayevo, Monastir, Rodes, Hanya (Kretia/Crete/Girit) i otras. Ademas, miles mas de sefaradim fueron deportados djuntos kon todos los otros djudyos de varios paises de la Evropa oksidental i oriental (de Fransya, Beljika, Olanda, Austria, Romania, Hungaria, i Italia), i toparon la misma fin maloroza. Uvo konsekuensas direktas i indirektas tambien en paizes komo Bulgaria, ke no deporto a sus djudios, i Turkia, ke no entro a la gerra. Los aktos anti-djudios durante la gerra, kavzo una emgirasion masiva al muevo estado Israel, lo ke desho estas komunidades enchikesidas i aflakadas.
Muestra intension es solo aksentuar la piedrita katastrofika de los sefaradim i sus kultura, entre todas las piedritas katastrofikas djudias de la Shoa. Sefaradim se fueron a sus muertes djuntos kon todos los otros djudios - sefaradim, ashkenazim, romaniyotes, italianos, i mas. Mos akodraremos ke mezmo en Gresia, los djudios ke fueron deportados de la sivdad de Yanina, eran en majoridad Romaniotes, i sus lingua era el grego.
En este chiko espasio, podemos solo mensionar en kurto la destruksion de komunidades sefaradis en la Shoa, porke kada komunidad, komo kada persona ke se deperdio o sovrebivio, merese a lo menos un livro aparte.
Komunidades Djudias de los Balkanes Destruidas en la Shoa
Los Almanes empesaron sus maldicha eliminasion de djudios en las rejiones de Ashkenazim, empesando mezmo antes de la gerra. A las rejiones sefaradis entraron mas tadre, empesando de Avril, 1941, kuando la Almanya atako a la Yugoslavia i Gresia. En kurto tiempo todas las komunidades de los Balkanes (kon la eksepsion de Turkia, ke no entro en la gerra) se toparon debasho del kontrol de las Fuersas de la Aksis (los Almenes i sus aliados) i sus kolaboradores. Komo en toda Evropa, las anihilasiones, se implimentaron en tres maneras: deportasiones a kampos de muerte, matansinas lokales en mano de alemanes, i matansinas lokales en mano de non-alemanas.
Gresia
Komunidades Djudias en Gresia en 1941
Okupasion de Gresia por las Fuersas del Axis 1941-1944
Blu: Zona Italiana
Kolorado: Zona Almana
Vedre: Zona Bulgara
Las komunidades de Gresia fueron anihiladas mezo deportasiones, en primero en las zonas okupadas por los almanes, I despues de septembre, 1943, kuando la Italia se entrego i salyo de Gresia, en las zonas ke avian sido Italianas. A la fin del enverano de 1944, la Gresia estava vaziada de todos sus Djudios. De la povlasion djudia ke avia en la Gresia antes de la gerra, el 87% murio en la Shoa. La katastrofia de Salonik fue la mas grave de todos.
Tabela del efeto de la Shoa en komunidades de rejiones ke oy estan en Gresia .6
KOMUNIDAD |
Populasion en 1941 |
Populasion en 1945 |
Porsentaje de piedridad |
Trakya |
|
|
|
Didimotika (Dimetoka) |
900 |
33 |
99% |
Orestias |
197 |
3 |
98% |
Alexandroupolis (Dedeagach) |
140 |
4 |
97% |
Komotini (Gumulcine) |
819 |
28 |
96% |
Xanthi (Iskeçe) |
550 |
6 |
99% |
Masedonia |
|
|
|
Kavala |
2100 |
42 |
98% |
Drama |
1200 |
39 |
97% |
Serres |
600 |
3 |
99% |
SALONIK |
56000 |
1950 |
96% |
Verria |
460 |
131 |
72% |
Kastoria |
900 |
35 |
96% |
Florina |
400 |
64 |
84% |
Tesalia |
|
|
|
Trikkala |
520 |
360 |
31% |
Larissa |
1120 |
726 |
35% |
Volos |
872 |
645 |
26% |
Gresia Vieja |
|
|
|
Chalkis |
325 |
176 |
43% |
ATENA* |
3000 |
4930 |
+64% |
Peloponeza |
|
|
|
Patras-Agrinion |
265 |
142 |
43% |
Epirus |
|
|
|
Yanya (Yanina) |
1850 |
163 |
91% |
Preveza |
250 |
15 |
94% |
Arta |
384 |
60 |
84% |
Las Islas |
|
|
|
Corfu |
2000 |
185 |
91% |
Zante (Zakynthosla) |
275 |
275 |
- |
Girit (Crete) |
350 |
7 |
98% |
Rodos (Rhodes) |
1701 |
40 |
97% |
|
|
|
|
TOTAL |
77178 |
10066 |
89% |
*Nota: De la komunidad de Atena, 1000 personas se deperdieron. La pujita despues de la gerra es a kavza de los refujiados ke kedaron en la sivdad. |
|||
(Nombres en turko adjustados por R.A.Bortnick) |
|||
Salonik
La mas grande komunidad de Gresia, i del mundo sefaradi en jeneral, era la de Salonik. Los Almanes entraron a la sivdad en Avril 1941, ma el primer golpo a la komunidad fue en Julio de 1942, kuando 2000 ombres djudios fueron arekojidos en la 'Plasa de Libertad' (Plateia Elepfteria) i forsados a kedar enpiez oras enteras, publikammente aharvados i arrebashados.7 El granrabino Zvi Koretz ke representava a los djudios los pudo liberarlos, ma al muy grande presio de dar el viejo semeterio djudio a la munisipalidad. (En este gran tereno sagrado se topa oy la universidad de Salonik.)
Eichman i sus kolaboradores vinieron a la sivdad en presipio de 1943 i empesaron sus fuertes persekusiones de djudios, ovligandolos tanbien a vistir la estreya amariya. En marso, anunsaron ke los djudios ivan a ser transportados a Krakow, Polonia, para aresentarsen ayi kon el ayudo de los djudios de akeya sivdad. Kaje todos kreyeron esta mentira porke no savian nada de lo ke se estava pasando en Polonya. El primer treno de deportados Saloniklis arivo a Aschwitz-Birkenau el 20 Marso kon 2800 personas, 2,191 de eyos imedietamente asasinados kon gaz. En todo uvo 19 “transportes” de djudios de Salonik a Auschwitz, 48000 personas, de los kualos 37000 fueron imediatamente matados en las kameras de gaz. Del 30 April asta el 8 Mayo, los Almanes arestaron los djudios de sivdades chikas en el norte de la Gresia - Orestias, Florina, Veroia, Souflion, i Didimotikon - i los transferaron kon vapor a Salonik. Estos estavan en el 17en transport. El kavo treno a Auschwitz salio el 9 Mayo, 1943. Tambien los de Drama, Xantis, Seres, i Kavala, fueron transportados a Salonik i de ayi a Auschwitz, i algunos a Treblinka. Los ultimos djudios deportados de Salonik fueron mandados al kampo de Bergen-Belsen en Augusto, 1943. Eyos eran prinsipalmente 74 miembros del “Judenrat” (Konsilyo Djudio) i 367 personas kon nasionalidad espanyola.
Siertos djudios Saloniklis sirvieron komo sonderkomandos8 en Auschwitz-Birkenau i tomaron parte en el revolto ayi en 7 Oktobre, 1944.
Pokos Saloniklis se salvaron en fuyendosen a las zonas Italianas, o en adjuntandosen kon la rezistensia. Lo mas no tuvieron la posibilita de fuyirsen, o de eskondersen, porke siendo ke sus lengua nativa era ladino, tenian aksento “djudio” kuando avlavan grego ke los davan a konoser. Tambien los gregos de la sivdad, lo mas siendo venidos de Turkia en el trokamiento de povlasiones de los 1920s, tenian animosidad kontra djudios. Tambien munchos djovenes no perkuraron a fuyirsen porke no kijeron despartirsen de sus famiyas i no se pudian imajinar el malo destino ke los asperava.
En augusto de 1943 Salonik ya estava vaziado de djudios, la komunidad ke era “Madre de Israel” nunka mas a retornar.
Atena i el resto de Gresia
Entre 1941 i 1943, Atena, komo lo mas de la Gresia al sud de Salonik, estava debasho del kontrol Italiano. Los Italianos se komportavan bueno kon los djudios, i munchos djudios se refujiaron aki de otras rejiones, asta ke la povlasion djudia de Atena pujo a 10000 en 1943. Ma en Septembre de 1943 la Italia se entrego a la Almanya, i travo sus fuersas de Gresia. Entonses los almanes tomaron kontrol de todas las zonas Italianas, I empesaron todas las persekusiones aki tambien. Al kontrario de Koretz en Salonik, el Granrabino Barzilai de Atena refuzo de ayudar a los Almanes, kemo todos los rejistros de la komunidad, i se fuyo. En Marso de 1944 800 Djudios fueron arestados en Atena. Entre Marso i Avril, los djudios de otras sivdades de Gresia, komo Yanina (Yanya), Arta, Preveza, Volos, Larissa, i Trikala fueron arestados tambien. De Volos munchos parvinieron a fuyirsen kon el ayudo de algunos Gregos.
Todos los ke fueron arestados fueron emprezados en el maldicho kampo Haidari en Atena, i de ay, en Avril, 1944, 5200 djudios fueron transportados en vagones de behemot a Auschwitz.
A los djudios de las islas de Rhodes i Corfu los deportaron en Junio i Julio de 1944, serka la fin de la gerra.
Rodes i otras islas
Rodes (Rodos) era parte del Imperio Otomano de 1522 asta 1912, kuando paso a la Italia por resultado de la gerra Balkanika de 1911-12. Ansi es ke kuando empeso a la Sigunda Gerra Mondial, la isla apartenia a la Italia, I los djudios estavan buenos. Ma kuando en 1943 los Almanes okuparon Rodes, trokaron el destino de los 2000 djudios ke bivian ayi.
La deportasion de los Djudios de Rodes fue la ultima de la Gresia, i el mas largo viaje a Auschwitz. En el 20 Julio 1944, 1700 djudios fueron transportados kon vapor de Rodes a Gresia, i en kamino el mezmo vapor se areto en la isla de Kos i tomo todos los djudios de ayi tambien. En el kamino de ocho dias (solo para yegar a Atena) murieron 23 personas de las kondisiones negras en el vapor, sin komida i sin agua, en la kalor fuerte. En los desdichados fueron metidos a asperar en el kampo de transito Haydari, i de aya fueron metidos en trenos i transportados a Auschwitz-Birkenau. Solo 151 Djudios de Rodes sovrebivieron la Shoa.9
Todos los 90 Djudios de Kos fueron matados, ansi ke todos de las 2-3 famiyas djudias ke bivian en la isla de Chios (Sakiz en turko.)
En Rodes, grasias al esforso del konsul Turko Selahattin Ulkumen, los ke tenian soditansa Turka i sus famiyas no fueron deportados. Ulkumen es onorado komo 'Djusto de las Nasiones' por Yad Vashem en Yerushalayim.
Los Djudios de Girit (Crete) fueron arestados en 21 Mayo 1944, i deportados del porte de Rethymno (Resmo) kon vapor. Ma el vapor se ondio en mar (a kavza de un torpedo de los Aliados) i todos los pasajeros murieron, aogados en las aguas del Egeo.
Las islas de la mar de Ionia eran istorikamente dependientes de Venezia, i nunka estuvieron debasho de la egemonia Otomana. Antes de la Sigunda Gerra, la isla de Corfu tenia 2000 Djudios de varios orijines: Romaniotas (ke avlavan Grego), Sefaradim (ke avlavan el djudeo-espanyol), i Djudios-Italianos (ke avlavan el Italiano.) La fuersas Almanas tomaron la isla de los Italianos en 1943, i en el 10 Djunio 1944 deportaron 1800 Djudios a Auschwitz. (200 djudios estavan eskondidos en kazas Kristianas.) De los desmazalados ke arivaron a Auschwitz (en julio, 1944) los Almanes deskojeron 435 para sirvir komo sonderkomandos. Ma estos refuzaron, preferando la muerte imediata komo el resto de sus kompatriotos korelijionarios.
En la isla de Zakynthos (Zante) la estorya es mas de alegrar. Todos los 275 Djudios de la isla se salvaron grasias a los esforsos del obispo (papaz) Krisostomos i el mayor Lukas Karrer, los kualos fueron tambien rekonosidos en Yad vaShem komo “Djustos de las Nasiones.”10
Kastoria I Yanina
Komo Salonik, Kastoria tambien era parte del Imperio Otomano asta 1912. En 1940 aki bivian 900 djudios. En 25 marso 1944, los almanes arestaron 763 djudios I los emprezaron en una eskola vazia por muchos dias sin agua I sin komida. Despues los transportaron en primero a Salonik I de ayi a Auschwitz-Birkenau. Solo 35 personas sovrebivieron.
En 1996 en Kastoria se dediko un memorial en onor de los viktimas.
Yanina, tambien no leshos de Salonik, es una sivdad ke tuvo djudios desde los tiempos Romanos. Kuando vinieron los sefaradim aki 15-16 siglos mas tadre, aki toparon la komunidad “romaniot” de djudios ke avlavan grego, bien enstalada, a la kuala se integraron.
Yanina tambien estava enprimero en la zona italiana, I despues paso a los almanes. En primero los almanes les disheron ke a eyos no los ivan a deportar komo los de Salonik. Ma en marso de 1944 arestaron al prezidente de la komunidad, Dr. Moshe Koffinas. El supo ke ivan ser deportados, mando avizo sekreto a un miembro del konsilyo djudio, Sabetai Kabelis , para ke todos se fuygan. Ma malorozamente Kabelis no paso el haber, I la komunita entera de 1850 personas fue mandada a
Auschwitz-Birkenau en 25 marso de 1944. Solo163 personas kedaron bivas.
Volos i otras sivdades de mas poka piedrita
Volos es un porto de mar serka de Larissa, entre Salonik i Atena. Antes de la gerra avia 880 djudios aki, biviendo muy repozados kon sus vizinos. Al empesijo de la okupasion, la isla paso a los Italianos, ke, komo siempre, se komportaron buenos, I algunos djudios de Salonik vinieron a refujiarsen aki. Kuando entraron los almanes, munchos djudios se adjuntaron a la rezistensia EAM, ose fuyeron a los kazales del entrono. En 25 Marso 1944 los Almanes dieron el orden de deportar a los djudios, pudieron aferrar solo 130 djudios, ma el resto est protejados kon el ayudo de la rezistensia, el arkobispo Joakim, i el Rabino Pesah. Los 130 djudios arestados fueron mandados a sus muertes en Auschwitz. Algunos murieron en gerreando o otras difikultades.
Despues de la liberasion de Gresia en oktobre de 1944, los djudios ke retornaron a Volos, toparon I los djudios eskondidos aboltaron a sus sivdad, toparon sus sinagoga, kazas I negosios destruidos. Kon tiempo la sinagoga fue restorada. Ma despues de 1948 munchos izieron aliya a Israel. I mas tadre, algunos vinieron a los Estados Unidos de l'Amerika. El arkebispo Joakim esta onorado en Yad vaShem komo un Djusto de las Nasiones.
En las sivdades de Tesalia (Trikkala i Larissa) Chalkis, i la Peloponeza, uvo menos piedrita de almas djudias a kavza del ayudo de la rezistensia, o de personas buenas ke ayudaron a eskonder i salvar sus vizinos.
Trakya i Masedonia
En 1941 la Almania aregalo a su aliada Bulgaria las rejiones de Trakya i Masedonia, i una parte de la Serbia oriental. En estas rejiones, ansi ke en Bulgaria propia, los Bulgaros empozaron las persekusiones de djudios. Ma el destino de los djudios en Bulgaria propria fue diferente de los de las zonas de Trakya I Masedonia.
En 4 Marso 1943, las otoridades Bulgaras arestaron 4000 Djudios de Trakya i 3 de la isla de Tamothraki, los transportaron a kampos de detension (Dupnitsa i Gorna-Dzhumaia) en el sudeste de la Bulgaria. Despues de dos semanas, a estos se adjustaron 158 mas Djudios traidos de la sivdad de Pirot, en Serbia. A todos (4,226 djudios) los transportaron en dos trenos a Lom (sivdad en el Danubio) i de Lom los Alemanes los metieron en kuatro barkas para mandarlos a Viena por el rio. En 5 a 8 dias, las barkas pasaron por Belgrado i Budapesht, ma no se save si todas yegaron en Viena. Una de las barkas dizen ke se undio kon todo su kargo umano. Los ke yegaron a Viena fueron mandados kon trenos a Treblinka, i ayi todos fueron matados devista. Es siguro ke ni una persona no kedo biva de estos transportes de Lom.
En 8 Mayo 1943, otros 1162 djudios fueron mandados de Trakya a Salonik, i al dia sigyente de Salonik a Auschwitz .
En la Masedonia Yugoslava, en 11 Marso 1943, la polisia Bulgara arekojo todos los 7400 Djudios de las sivdades de Monastir, Skopye, i Shtip i los emprezo en el depo de tobako “Monopol” en Skopye, en muy negras kondisiones. Despues de 11 dias liberaron 165 personas - 65 doktores i farmasistos ke el governo tenia de menester, i otros de soditansia estranjera. Al resto los mandaron a Treblinka en tres konvoyes de trenos (entre el 22 i 29 Marso), en 7-8 dias de kamino, i ayi kaje todos fueron matados de vista (imediatamente). El kavo treno partio de Skopye el 29 Marso i arivo el 5 Avril en Treblinka , yevando 2404 Djudios (2300 de eyos Monastirlis) a sus muerte.11 Aparte de las 12 personas ke murieron en kamino, 7,144 djudios de Masedonia murieron en las kamaras de gas de Treblinka, 2000 de eyos siendo kriaturas de menos de 16 anyos.
Solo 200 djudios de Masedonia sovrebivieron la Shoa, i lo mismo de Trakya. Algunos de eyos gerrearon kon los partizanes o fueron eskondidos por kristianos. Tambien sovrebivieron pokos ke en 1941 i 42 se avian fuyido a la zona italiana de Gresia.
En las zonas Italianas, los djudios estavan mas bien tratados, aunke la Italia era aliada de la Almanya. Por esto 5000 Djudios (en mayoriya Sefaradim) de la zona Almana en Yugoslavia i de la Kroasia fashista se fuyeron a Dalmasia (el bodre de la mar Adriatika) ke era zona Italiana. Unos de eyos fueron aferrados por los Almanes despues ke kayo Mussolini, ma lo mas de eyos sovrebivieron, protejados por los partizanes. En todo, 7000-10000 Djudios de la Masedonya Yugoslava (Ashkenazim i Sefaradim) fueron deportados a kampos de muerte i depedridos.
La propria Bulgaria
El governo Bulgaro ayudo a los Almanes Nazis en la matansina de Djudios en Trakya i Masedonia debasho sus kontrol, ma impedio la deportasion de los serka 50,000 djudios de la Bulgaria propria. Aun kon esto, empozo leyes kontra djudios, i deporto munchos al interior del pais ande ombres fueron forsados a lavorar en kampos (lo mas para fraguar kaminos i rayas de treno) en kondisiones brutalas, I la vida fue difisil. Ma ni un djudio Bulgaro fue deportado a los kampos de los Nazistos.
En el 9 Septembre 1944 entro al pais la armada Rusa Sovietika, I dio fin a las leyes antidjudias.
La Bulgaria fue el solo pais debasho la okupasion Almana ande la povlasion djudia pujo durante la gerra, de 45,565 en 1934, a 49,172 en 1945. Esto konstitue otra estorya enteresante, sovre la kuala se puvlikaron livros i se izo un filmo dokumentario tanbien12. Lo mas de los Djudios Bulgaros izieron aliya a Israel despues de la gerra.
Eksterminasiones lokales en Serbia i Kroasia
En siertas rejiones de Yugoslavia, djudios fueron matados sin ser deportados. En Serbia bivian 16,000 djudios, la mas grande parte Sefaradim, de los kualos 11,000 moravan en Belgrado, la kapitala, i el resto en Nish, Smederevo, i otras sivdades. La persekusion de djudios en Serbia empeso apenas entraron los Almanes Nazistos en Avril 1941. Todos los ombres de edad de 16 asta 60 fueron devista mandados a kampos de lavoro duro, i todos eyos fueron matados en poko tiempo por los miembros del Wehrmacht (soldados Almanes) i el SS. Todas las mujeres i kriaturas fueron emprezadas en 1941 en el kampo Sajmiste, en la sivdad de Zemun13, serka de Belgrado. Aki mataron 7500 personas en 1942 kon gaz trayido en kamyones. En todo 14,500 Djudios de Serbia, ke es 90% de los 16,000 ke avia antes de la gerra, fueron matados en sus pais.
Los masakros mas teribles de Evropa en la Sigunda Gerra akontesio en el estado de Kroasia, ke inkluyiva tambien Bosnia i Herzegovina. Aki en 1941 bivian unos 14000 djudios, 10000 de eyos en Sarayevo (Bosnasaray o Saraybosna), 9000 Sefaradim i 1000 Ashkenazim.
El partido pro-Nazi Ustashe deklaro el Estado Independiente de Kroasia el 10 Avril de 1941. Los Ustache masakraron unos 800000 Serbos, I aborresian a los Djudios tambien. Kroasia apliko todas las persekusiones anti-djudias de los Nazis, ovligo a los djudios de metersen la estreya amariya, I konfisko todas las propriedades djudias. Algunos djudios de Bosnia parvinieron a fuirsen a la zona Italiana en Dalmasia, ma lo mas no.
Los Almanes okuparon Sarayevo en 15 Avril, 1941, i pokos dias despues destruyeron la sinagoga Sefaradi, arestaron i mataron sienes de djudios. (La famoza Agada de Sarayevo sovrebivio esta perioda.) Persekusiones sigyo en Zagreb (ande la sinagoga fue destruida) i otras sivdades. Todos los de Zagreb fueron mandados a Auschwitz. Entre Avril I djulio 1942 serka 3000 Djudios, lo mas de la sivdad de Osijek, fueron mandados al kampo de konsentrasion de Tenja. De estos, 200 fueron transportados al kampo de Jasenovac i 2800 a Auschwitz, ande kaje todos murieron.
En Septembre i Oktobre de 1941 mandaron a los ombres Djudios de Sarayevo i otras sivdades a kampos komo Jasenovac, ande murieron del lavoro duro i kondisiones inumanas, o fueron brutalmente matados. Las mujeres tanbien fueron mandadas al mezmo kampo i a otros en los primos mezes de 1942, kon el mezmo rezultado. A los ke kedaron bivos de estos kampos los almanes los deportaron a kampos de muerte en Polonya.
Despues de la kapitulasion de Italia en Septembre de 1943, la Almanya okupo las provinsias Italianas en la zona Adriatika, ande tambien destruyeron kehilas, i mandaron los Djudios a sus muertes en Jasenovac o Auschwitz.
En el kampo de Jasenovak se topan los nombres de los 12,765 djudios matados ayi. Serka 30,000 djudios fueron matados en el Estado Endependiente de Kroasia. En todo, unos 60000 djudios de Serbia i Kroasia, la mas parte Sefaradim, fueron asasinados. Ma uvo tambien munchos ke se salvaron porke les ayudaron sus vizinos I amigos non-djudios, o ke se fueron kon los partizanes. Mas de sien Kroasionos son rekonosidos por Yad Vashem komo 'Djustos de las Nasiones'.
Sefaradim en la Evropa
Sefaradim, lo mas de orijin Turka-Otomana, avian emigrado a la Evropa (sovre todo a Fransia, Beljika, i Italia) en los primos 20-25 anyos del siglo 20. Asigun los raportos de Serge Klarsfeld, investigador de las detruksiones en la epoka Nazista, de los 80000 Djudios de Fransia deportados a la muerte, kaji 5000 eran de orijin Turka, i 300 de eyos eran de nasyonalitad Turka. Entre el resto avia: 140 djudios de Bulgariya, 53 de Eretz Israel (entonses Palestina), 1499 de Gresia, 133 de Yugoslaviya, 2 de Lebanon, 17 de Siria, 18 de Ejipto, ets.14 Diplomados Turkos parvinieron a salvar unos 2000 djduyos de soditansia Turka en Evropa, ma el resto de los Sefaradim tuvieron la mizma fin maloroza ke todos los otros Djudios de Evropa.
Konkluzion
Desde la Ekspulsion de Espanya, los Sefaradim ke bivieron en el Imperio Otomano formaron una entidad djudeoespanyola adientro de un mozaiko de varias kulturas. Kuando el Imperio se despartio en diversos estados nasionales, la entidad sefaradi se despedaso ma kedo unida kulturalmente en la djudeoespanyola.
Esto es el fenomeno del kual no se rendieron kuento los espesialistos ke se okuparon de enstalar un monumento en Auschwitz-Birkenau kon las lajas ke representan las lenguas ke avlavan los viktimas.
La Shoa es un katastrofo ke toka a las mas profundas emosiones de kada djudio, porke en nivel emosional, kada uno de mozotros es un 'sovrebiviente.' Komemorar, akodrar, i saver lo ke se paso es muestro dover, komo es tambien rogar i lograr a ke nunka akonteska mas, ni a mozotros ni a dingunos.
Ma tambien, komo sovrebivientes Sefaradis es muestro dover salvar del olvido la kultura i lengua djudeoespanyola ke era de muestros ermanos desaparesidos en la Shoa, i es muestra presiada erensia.
Notes
1. Rachel Amado Bortnick is emeritus professor of ESOL and founder in 1999 and moderator of the online Ladino conversation website, Ladinokomunita. Born and raised in Izmir, Turkey, she came to the US for college, has always sought out Ladino speakers, and is one of the main instigators of the Ladino/Judeo-Spanish revival in the United States.
2. El filmo de la seremonia de la dedikasion de la laja en djudeoespanyol de Auschwitz se topa en:
http://www.youtube.com/watch?v=MMGHep_8m08&feature=youtu.be . Ay seksiones ande avlan en franses, djudeoespanyol, inglez, i espanyol. Mas sovre JEAA i m unchas fotos se topan en: http://www.sephardicstudies.org/jeaa.html., ansi ke en http://michel.azaria.free.fr/. Mi artikolo mas detaliado a la okazion de los 10 anyos de esta seremonia se topa en el no. 26 del boletin elektroniko DIYALoG de Izmir.
3. Los statistikos aparesen, entre otros, en el sitio
http://en.auschwitz.org/m/index.php?option=com_content&task=view&id=357&Itemid=8
4. La lista de los transportes, kon todo los detalyos de kada konvoy, se topan en munchos manaderos, entre eyos en el livro, Remember the Holocaust in Greece, New York 1995.
5. Esto es una estimasion de JEAA (Judeo-Espagnol a Auschwitz) ke aparese en sus literatura i en sus sitio de web. Haim Vidal Sephiha et al., Yiddish and Judeo-Spanish: A European Heritage Brussels: European Bureau for Lesser Used Languages, 1997. No se puede saver el numero egzakto porke los sefaradim no se distingen de otros djudios en los datos de deportasiones.
6. Esta tabela tomada del livro, Robert Bedford, ed., An Introduction to Literature on the Holocaust in Greece, Brooklyn, 1994. Manadero: “Black Book of Localities whose Jewish Population was Exterminated by the Nazis”, Yad Vashem, Yerushalayim, 1963.
7. Estos ombres fueron liberados despues ke el Konsilio izo un akordo kon los Almanes, dando el semeterio djudio - antiguo, grande, i muy presiozo para los djudios – a la munisipalidad de Salonik. En este lugar sagrado del viejo Semeterio Djudio oy en dia se topa la Universidad de Salonik, sin dingun sinyo de su pasado. Al Rabino Zvi Koretz, ke era prezidente del Konsilio, munchos lo konsideran un kolaborador de los Nazis i en grande parte kulpable de la destruksion de la komunidad.
8. Sonderkomandos, o 'tabur espesial',eran los prizonyeros forsados a akarrear los muertos a los krematorios, i azer otros echos makabres.
9. En los ultimos mezes se inoguro un muevo filmo dirijido de Ruggero Gabbai sovre los djudios de Rodes en la Shoa: "The Longest Journey, The Last Days of the Jews in Rhodes.” Podesh meldar (en inglez) aki: http://www.primolevicenter.org/Home.html
10. La istoria umana de Zante (Sakynthos) merese ser bien konosida. Una bushkeda “search” en Internet da munchos manaderos de enformasion.
11. Del livro de Marc Cohen, Last Century of a Sephardic Community: The Jews of Monastir, 1839-1943, New Jersey/York: FASSAC, 2003.
12. El filmo ke trata de la salvasion de los djudios de Bulgaria es: The Optimists: The Story of the Rescue of the Bulgarian Jews from the Holocaust (2001). Entre los livros: Michael Bar Zohar, Beyond Hitler's Grasp: The Heroic Rescue of Bulgaria's Jews (1998); Viki Tamir, Bulgaria and Her Jews: The History of a Dubious Symbiosis (1979).
13. Debasho del imperio de Hapsburg, la sivdad de Zemun se konosia komo Semlin, su nombre Alman. El famozo rabino Yuda Alkalai, ke se konsidera el primer Sionisto, bivyo i eskrivyo aki.
14. Asigun transmetido por David Anjel, en su konferensia sovre “Djudios de Turkia i la Shoa”, 11 Marso, 2007, en el enkontro del “Salon de Ladino” en Tel Aviv, dando statistikos basados en el livro, Mémorial de la déportation des juifs de France de Serge Klarsfeld.
Seleksion Kurta de los Munchos Manaderos Konsultados
Gutman, Israel, ed. Encyclopedia of the Holocaust. N.Y.: Macmillan, 1990.
Rodrigue, Aron. "Sephardim and the Holocaust" (Konferensia de 19 Fevrero, 2004, publikada del Center for Advanced Holocaust Studies: http://www.ushmm.org/research/center/publications/occasional/2005-07-01/paper.pdf)
Cohen, Mark. The Last Century of a Sephardic Community. The Jews of Monastir 1839-1943. N.Y: FASSAC, 2003
Bedford, Bob, ed. An Introduction to Literature on the Holocaust In Greece. FASSAC ,1994 http://www.ushmm.org/museum/exhibit/online/greece/greece.pdf
http://www.rhodesjewishmuseum.org/holocaust.htm
http://www.ushmm.org/wlc/en/index.php?ModuleId=10005456
Para ver mas fotos i enformasion sovre el monumento de Auschwitz, anda a: http://www.scrapbookpages.com/AuschwitzScrapbook/Tour/Birkenau/Birkenau02.html